Vizita Amu Papa iha TL, PNTL Prontu Garante Seguransa Featured

By Domingos Gomes Maiu 19, 2024 635
 Segundu Komandante Jerál PNTL, Komisáriu Pedro Belo. Foto:media PNTL. Segundu Komandante Jerál PNTL, Komisáriu Pedro Belo. Foto:media PNTL.

DILI: Durante vizita Amu Papa iha Timor-Leste (TL), Polisia Nasional Timor-Leste (PNTL) preparadu no prontu asegura seguransa iha rai laran.

Segundu Komandante Jerál PNTL, Komisáriu Pedro Belo hateten, relasiona ho vizita Amu Papa mai Timor Leste iha fulan Setembru tinan, Polisia Nasionál Timor- Leste (PNTL), preparadu ona atu fó seguransa.

“Ita Preparadu ona in-termus planu, atu simu amu papa nia vizita, planu konaba oinsá atu simu, ita mós sei hare iha parte rekursu umanu iha parte ida mós ita hare iha lojístika nian, maibé atu dehan katak ita preparadu,” dehan Pedro ba jornalista sira iha Komandu Jerál Kaikoli, (16/05).

Nia informa, konaba parte rekursu umanu, komandu PNTL prepara ona kondisaun, hotu  preparadu para hein tempu hodi halo operasaun asegura seguransa ba vizita amu papa nian no ba povu Timor-Leste iha enventu importante ida ne’e.

“Lojístika nian mak iha sasán balun ne’ebé mak iha konaba radiu komunikasaun balun iha ona no balun ne’ebé presiza sei aumenta tan, agora dadaun ita hato’o ona Governu atu apoiu iha parte lojistika nian.

Tanba ne’e hakarak ka lakohi tenke asegura duni situasaun ida ne’e para amu papa mai vizita bele la’o ho di’ak atu nune’e Timor Leste nia naran bele di’ak iha rai liur ne’ebá.

“Joven sira ne’ebé mak agora daudaun lakohi koopera no hakarak halo barullu tun sa’e, sira ne’ebé mak malandru demais hau haruka para polisia kaptura sira sulan iha sela ita labele tolera joven sira ne’ebé halo krime,” subliña nia.

Molok ne’e Komandante  Komandu Pesoál Formasaun , Superintendente Xefe Polísia,  Arquimino Ramos hateten, Komandante Jerál Polísia Nasionál Timor-Leste (PNTL), Komisariu Jerál Henrique da Costa tau ona iha planu komandu nian atu dada membru PNTL sira ne’ebé deztakadu iha Komandu PNTL Munisipiu idak-idak atu  bele reforsa membru PNTL sira ne’ebe atu fó seguransa  másimu iha ambitu vizita Sua Santidade Papa Francisco mai Timor- Leste.

“Sim, Komandu PNTL nia preparativu ba vizita seguransa ba Sua Santidade Papa nia vizita hosi Komandu preparadu, tanba tuir planu ne’ebé mak Komandu Jerál PNTL iha sei bolu membru PNTL sira ne’ebé  halo servisu iha Komandu Munispiu mai iha Dili para bele apoiu membru PNTL sira iha Dili atu asegura vizita Sua Santidade Papa Francisco mai Timor- Leste,” Arquimino Ramos hateten ba jornalista sira bainhira halo abertura ba atividade re-treinamentu ba membru Task force nain-30 ne’ebé halao iha Unidade Espesiál Polísia (UEP), Bairru Pite foin lalais ne’e.

Nia dehan, ladun fikxa númeru efetivu kada hosi Komandu Munisipiu hira mak sei apoiu  membru PNTL sira iha Dili atu asegura vizita ida ne’e, tanba ne’e kompeténsia Komandu PNTL atu haree ida ne’e.

“Komandu Jerál sei komunika ho KomanduPNTL Munisipiu sira atu haree kon-ba kestaun ida ne’e tanba asuntu sira hanesan Komandu Jerál sei halo halo desizaun bazea ba iha despaizu Komandante Jerál,” adianta nia.

Nia subliña, agora dadaun Komandu PNTL deside hodi halo  re-treinamentu ba membru PNTL forsa rezerva ka Task force hosi munisipiu 14.

Nia dehan, treinamentu ne’e sei foku ba iha ba PNTL nia atuasaun sira oinsá  mak atu uza forsa, iha momentu  ida ne’ebé? bainhira mak uza lei forsa? no tékniku polisiál sira selu,  atu nune’e bainhira  PNTL halo atuasaun karik labele fora hosi medida sira ne’ebé PNTL iha.

“Komandu PNTL hahú re-treinamentu ba membru sira atu kontinua hasae sira-nia koñesimentu tékniku atuasaun polísiál nianno hosi atividade re-treinamentu ne’e  objetivu atu fó hanoin ba  membru sira  bainhira a halo atuasaun karik oinsá mak sira atu uza forsa no iha momentu  ida ne’ebé,  bainhira mak uza lei forsa no tékniku polisiál sira seluk  atu nune’e bainhira  PNTL halo atuasaun karik labele fora hosi medida sira ne’ebé PNTL iha,” haktuir nia.

Nia informa atividade re-treinamentu  ne’e  Komandu PNTL  oferese ona ba   membru Task force husi Komandu PNTL munisipiu Aileu, Baucau, Lautém no ohin ita halao ba membru Taskforce hosi Komandu Munisipiu Dili, membru sira ne’ebé partisipa iha atividade ida ne’e iha ema nain-30 tanba menus orsamentu no atividade ne’e halo durante semana ida

Tanba ne'e atividade re treinamentu ida ne’e nu'udar meus Komandu nian atu prepara membru PNTL  husi Taskforce  atu  fó  seguransa ba eventu bo’ot sira.

“Ita bo’ot sira hatene agora dadaun ita atu simu vizita Papa nian  mai ita-nia rai no atividade re-treinamentu sira hanesan prepara ita-nia membru PNTL sira atu  fó susesu ba ita-nia eventu bo’ot ida ne’e,” hakotu nia.

Rate this item
(0 votes)

Independente Digital TV