Enkuantu, apoiu nee paradu tanba, haree ba orsamentu no mós stok sasan iha armazen laiha.

“Apoiu emerjensia ba vitima inundasaun 4 abril ita akaba ona familia uma kain rihun 38, ita sei falta rihun 2, nee ba apoiu rekuperasaun ba sira nia uma, tanba ita nia orsamentu neebé ita tau iha OJE 2021 nee la too, no iha OJE 2022 nee mak ita foin tau ba para hodi bele apoiu ba uma sira neebé iha aat kaman, aat total no aat naton,”dehan nia jornalista sira iha edifisiu SEPS, segunda nee (21/02).

Nia hatutan, ba uma kain sira neebé seidauk rejolve nee tanba, stok sasan iha armazen dadauk nee laiha no orsamentu foin tau iha OJE 2022, nunee bele rejolve hotu iha tinan ida nee.

“Agora dadauk ita prosesu hela akizasaun material para hodi bele responde ba vitima sira hamutuk rihun 2 nee,”haktui nia.

Nia akresenta, ba intervensaun mediata kuandu sasan sira nee kompletu no orsamentu atu halo intervensaun nee foin iha nee.

Tanba iha tinan kotuk, aloka deit orsamentu ba iha rihun 3 familia no familia vitima sira neebé hetan uma estragus nee hamutuk rihun 5 resin.

Ho nunee, SEPS atende uluk ona familia uma kain hamutuk rihun 3 no falta familia vitima rihun 2 mak seidauk, tanba orsamentu la to’o, no orsamentu foin tau iha OJE 2022 nee.

“Iha tinan 2021 nee mós ita iha dekretu lei foun ida (dekretu lei nú 7/2021), neebé hasa’e tan ajudu ba iha rekuperasaun sira ba uma kain sira neebé aat, uluk ita ajuda programa mão de obra ho montante dolar amerikanu $380 agora ita ajuda mão de obra nee to’o iha dolar amerikanu $1000 ho tan aumenta sasan,”hakotu nia.

Asistente Editor: Saturnina da Costa