Vise PM deklara kestaun ne’e relasiona ho informasaun kona-ba kobransa ne’ebé autoridade lokal balun halo ba komunidade sira ne’ebé simu subsidiu.

Armanda dehan, governu sei fo rekoñesimentu ba Autoridade Lokal sira-nia serbisu durante ne’e hodi fasilita komunidade sira ne’ebe  trata dokumentu atu asseesu ba subsidiu, tan ne’e nia husu ba autoridade sira atu labele halo kobransa ba komunidade sira ne’ebé simu subsidiu.

“Konserteja governu sei rekoñese sira-nia serbisu tanba serbisu sira ne’e hotu konta hamutuk ho tekniku sira mak ohin loron distribuisaun ba subsidiu ne’e bele lao,” dehan nia ba jornalista sira bainhira halo vizita ba Munisipiu Lautem hodi observa prosesu pagamentu subsidiu ba uma-kain, Sesta (12/06).

Vise PM ne’e dehan, Diploma Ministerial hatete klaru ona se karik iha autoridade lokal balun halo failansu ruma kontra regra sira ne’ebe estadu hatur ona sira sei ba hatan tuir Lei ne’ebé vigora iha Timor-Leste.

“Pagamentu ne’e ita halo, ita koopera ho parte hotu-hotu, PDHJ no KAK, tanba ne’e duke tan $100 ita ba hatan iha Tribunal di’ak liu ita evita buat sira ne’e hotu par labele akontese ba ita-nia ema sira,” dehan nia.

Entretatu, tuir informasaun, autoridade local balun iha Suku Lakaua, Postu Administrativu Luro, Munisipiu Lautem, halo kobransa $10.00 ba kada uma-kain ne’ebé simu subsidiu ho razaun nu’udar rekoñesimentu ba autoridade lokal nia kolen.

Tuir informasaun husi fonte ida husi suku Lakaua katak, hafoin nia ho nia kolega simu subsidiu, autoridade lokal ida halai tuir hodi husu atu selu nia kolen.

“Nia halai mai hodi dehan ‘imi mak hatene de’it ona, durante ne’e imi hela iha kota (Lospalos Vila), ha’u mak urus imi-nia dokumentus iha ne’e, ne’ebé imi tenke fó osan sigaru nian, dollar $10;,” dehan fonte ne’e hodi konta tuir lia-fuan husi autoridade lokal ne’e.

Tuir autoridade lokal ne’e, fonte ne’e hatutan, osan $10 balun selu ba nia kolen no balun sei tau iha kas aldeia nian atu nune’e bainhira mosu dezastre naturais bele atende.

Fonte ne’e dehan, molok ne’e, bainhira rona governu atu fahe subsidiu, autoridade local ne’e badinas tebes identifika nia ema sira no ajuda hodi trata ficha familia.

Maibé, bainhira simu tiha subsidiu, nia foin hatene katak autoridade ne’e iha intensaun oin-seluk.

“Nia husu ami ema ida fó $10, ami fó no fila kedas ba uma, ami la hatene ena seluk mós fó hotu ka lae,” nia dehan.