Bazeia ba informasaun ne’ebé Jornal INDEPENDENTE asesu, Vise Ministra aprezenta karta rezignasaun ba PM Xanana tanba konfrontu ho Ministra Finansas, Santina Viegas Cardoso, kona-ba diferensia hanoin ba politika no programa Ministériu Finansas nian.
“Vise Ministra nia karta rezignasaun iha ona Primeiru Ministru nia meza ona,” dehan fonte importante ida, ba Jornalista Jornal INDEPENDENTE, Kinta (15/01).
Ho informasaun ne’e, Jornalista Jornal INDEPENDENTEhakat ba edifisiu Ministériu Finansas (MF) hodi halo konfirmasaun.Fonte interna balun informa katak Vise Ministra la tama servisu dezde 14 Janeiru ne’e.
“Vise (Ministra) la tama dezde horseik (14/01),” fonte ne’e hatete.
Enkuantu, iha Parlamentu Nasionál, jornalista sira koko husu klarifikasaun husi Ministra Finansas, Santina Viegas Cardoso, relasiona ho rezignasaun Vise MF.Maibé, Ministra ne’e hatete katak ida ne’e laos ninia kompetensia.
“Ha’u hanoin ida ne’e la’os ha’u-nia kompeténsia atu responde,” dehan Ministra hafoin audensia ho Komisaun C PN, Kinta (15/01).
Iha parte seluk, PM Xanana ne’ebé hetan intervista husi jornalista sira, rekuza atu fo informasaun kona-ba asuntu ne’e.
“Husu ba nia (Vise MF), husu fali mai ha'u,” PM Xanana hatan, hafoin enkontru ho PR Horta, iha palasiu prezidensia Bairo-pite.
Entretantu, tuir observasaun Jornalista Jornal INDEPENDENTE, iha 15 Janeiru,maizumenus tuku 4 loraik, PM Xanana halo vizita urijente ba edifisiu MF.
Maske nune’e, to’o notisia ne’e publika, seidauk iha informasaun ofisial kona-ba objetivu husi vizita urijente ne’e.
