Ministru MEJD, Armindo Maia, politika governu nian liu husi ministeriu edukasaun, garantia katak, ba ema ho defisiensia hotu bele asesu ba edukasaun inkluzivu, no durante ne'e MEJD apoiu fó formasaun hodi hatudu sentidu ba maluk defisiénsia sira.
"Hanesan ita hotu hatene, ita nia parseiru dezenvolvimentu UNICEF apoiu ekipamentu ba ita nia asosiasaun halibur defisiensia matan nian, hanesan makina impresaun braille no makina ketik nian no makina gravasaun dijital, nune'e mós software ne'ebé bele ajuda hadi'ak ensinu no aprendizajen ba labarik sira ne'ebé ho defisiensia visual," dehan nia ba jornalista sira, iha Eskritoriu AHDMTL Manleuana, segunda ne'e (27/06).
Nia hatutan, MEJD sei haree material ne'ebé sira presiza iha tinan oin mai, atu ema ho defisiénsia bele aprende ho diak.
Iha fatin hanesan reprezentante UNICEF iha Timor-Leste, Bilal Durrani, hateten, partikularmente kontenti entrega material sira ba ema ho defisiénsia.
Tanba, material ne'e lori sira ba asesu edukasaun no informasaun loron-loron.
"Loron ohin, ha'u partikularmente sente kontente hola parte iha seremonia ida-ne'e hodi entrega ekipamentu sira hanesan makina impresaun Braille no makina ketik nian, makina gravasaun dijital nune'e mos software ne'ebe mak bele ajuda hadi'ak ensinu no aprendizajen ba labarik sira ne'ebe mak ho defisiensia vizual", dehan nia.
Nia hatutan, UNICEF la'os suporta de'it ekipamentu maibé halo renovasaun ba fatin dormitoriu labarik mane nian, fasilidade sintina, bee moos, saneamentu no Ijiene, nune'e mós espasu fatin aprendizajen temporariu iha sentru asosiasaun defisiénsia matan.
Nia dehan, ho apoiu ekipamentu no material ne'e, atu hadi'ak ensinu aprendizajen ba labarik sira ho defisiénsia matan iha Timor-Leste. Ne'ebé konsagra ona iha Konstituisaun da Repúblika Timor-Leste nian.
Nia esplika, eskola sira iha nasaun Timor-Leste ladun ekipadu atu suporta aprendizajen, laiha manorin ne'ebé ho espesializadu ba difisiensia sira, oinsa sira bele asesu ba kualidade edukasaun.
Relasiona ho ida-ne'e, UNICEF parseiria ho AHDMTL halo ona treinamentu ba manorin AHDMTL nian kona-ba, oinsa hanorin labarik sira ne'ebé ho defisiénsia matan kona-ba literisia no númerasia baziku, uza braille no suporta teknolojia.
Tanba ne'e, UNICEF servisu hamutuk ho ministeriu sira atu hadi'ak provizaun labarik sira ho defisiensia iha nasaun. Halo kolaborasaun hamutuk ho MEJD fasilita sira, hodi asesu mos ba edukasaun naun formal.
Iha tinan 2021, ajuda ona ekipamentu ba munisipiu tolu hanesan, Likisa, Ermera no Bobonaro, hodi asesu ba edukasaun no informasaun no mós asosiasaun defisiensia matan halo avaliasaun nesesidade ba labarik sira ho defisiénsia vizual.
Entretantu, Diretór interino AHDMTL, Gabriel Ponciano Sousa, lori estrutura nian naran, hato'o apresiasaun ba UNICEF ne'ebé apoiu ekipamentu hanesan, printer Brailler, printer manual, brailler nian no material seluk tan, ne’ebé sei fasilita membru defisiénte sira bele apreende iha fatin refere.
Aleinde, Diretór ne’e, agradese mós ba UNICEF ne'ebé fó apoiu ona orsamentu purvolta dolar amerikanu rihun $14, hodi halo atividade defisiensia nian iha munisipiu tolu hanesan, Ermera, Bobonaro no Likisa.
