Enkuantu, total item sira ne’e hamutuk 118.

Tuir Reprezentante UNDP, Munkhtunya Altangerel hateten, UNDP entrega ekipamentu médiku sira ne’e bá dala-lima nian, ne’ebé atu sustenta governu Timor-Leste.

“Ho totál kategoria diferente, item 118 ba sasán médiku sira ne’ebé mak to’o mai Díli iha fulan ikus fevereiru 2022 ne’e, no intrega iha fulan klaran Juñu 2022,” dehan nia liu husi intervensaun ba serimonia intrega termu mediku, iha armazen SAMES-Kampun Alor, segunda ne’e (20/06).

Nia hatutan, parte UNDP sei kontinua servisu hamutuk ho MS, hodi haruka restante bá konsumável, ekipamentu médiku no medikamentu sira.

Nia haktuir, realidade hatudu katak, TL presiza ekipamentu barak liután, atu bele to’o mai iha Díli, no tuir planu sei to’o iha fulan-Juñu nia rohan, ka inísiu fulan-Jullu mai.

“Ami hakarak hato’o agradesimentu ba ita boot sira nia konfiansa forte ba UNDP, no mós bá ekipa MS, ba sira-nia kolaborasaun efisiente ho ekipa UNDP iha Díli, akompaña hodi garante akizisaun ba sasán medikamentu esensiál sira to’o mai iha Díli tuir tempu,”nia dehan.

Nia esplika, Ministériu Saúde mak aloka millaun $6,3 hodi halo akizasaun ba madikamentu no ekipamentu saúde hirak ne’e.

Enkuantu, Reprezentante UNDP ho World Food Programme (WPF), entrega ekipamentu médiku nian ne’e bá SAMES, no simu direta husi Ministra Saúde (MS), Odete Maria Freitas Belo.

Iha fatin hanesan, Ministra Saúde, Odete Maria Freitas Belo, hateten, Ajénsia programa Nasoens Unidas ba Dezenvolvimentu hanesan parseiru ne'ebé koopera no servisu hamutuk ho MS iha área aprovizionamentu nian.

"Iha tinan 2020 kedas, bainhira Covid-19 ne'e akontese , ita iha kompras ruma ne'ebé mak hala'o husi SAMES, i aumezmu tempu ita mós halo kompras ba sasan sira ne'ebé mak liga ho pandemia Covid-19, ita husu hela ba iha UNDP mak halo servisu aprovizionamentu , entaun ita koloka osan ba UNDP no sira mak halo prosesu aprovizionamentu", tenik nia.

Ministra informa, serimónia termu entrega ne'e nu'udar kna'ar MS nian, atu observa ba sasan ne’ebé aseita ona entre parte rua iha kontratu nia laran.

"Entaun, aimoruk sira ne'e balun ita simu ona, balun distribui ona no agora stock-out, prontu iha item balun ne ebé foin lalais iha 2021, ita halo fali transferensia seluk, aimoruk sira ne'e dadaun to'o iha ita nia fatin, ita iha obrigasaun para atu bele mai simu, mai haree, los duni ga lae, sasan ne'e ita nia duni ga lae, sasan ne'ebé ita husu ne'e, sira kompras tuir duni ita nia hakarak ga lae. Ne’e responsabilidade Ministériu Saúde nian para atu bele haree, no ohin ami halo termu de entrega, espera katak sasan sira ne'e ita bele uza ba nesesidade fasilidade saúde sira nian,”esplika MS.

Entretantu, fasilidade médiku sira ho items hamutuk 118 ne’e, kompostu husi, kategoria ba konsumaveis nian iha 72, ekipamentu médiku no asesóriu sira 42, medikamentu esensial iha haat (4), embalajen transparente iha unidade 52.000, steriking  sterilization pouch self-seal ho unidade 24,600, 3-way stop cock Lipit resistant iha pakote 10,000 no Gelatamp Curaspon ho unidade 5.000.

Enkuantu, orsamentu ne'ebé MS aloka ba UNDP hodi halo akizasaun ba medikamentu no ekipamentu sira ne'e hamutuk dolar amerikanu tokon U$6,3.