Tuir komunikadu ne’ebé online INDEPENDENTE asesu katak durante enkontru ne’e, Enterprise Singapore manifesta ninia prontidaun atu servisu hamutuk ho TradeInvest Timor-Leste hodi organiza Business Forum ida iha Singapure. Liuhusi inisiativa ne’e, ESG sei fasilita partisipasaun no konvite ba investidór potensiál sira ne’ebé iha interese atu investe iha setór prioridade Timor-Leste nian, hanesan turizmu, indústria no manufatura, agrikultura, no área estratéjika sira seluk.
Enterprise Singapure mós manifesta ninia disponibilidade atu apoia programa formasaun no dezenvolvimentu kapasidade. Iha kontestu ida ne’e, ESG introdús Singapore Cooperation Enterprise (SCE), subsidiária ida husi Enterprise Singapore, nu’udar entidade responsável ba lidera apoiu tékniku no implementa programa kooperasaun institusionál entre parte rua.
Iha ninia aprezentasaun, SCE esplika katak servisu sira ne’ebé oferese inklui programa kapasitasaun ba funsionáriu públiku no setór privadu, organizasaun vizita estudu ba indústria no empreza sira iha Singapore, servisu asesoria no konsultoria, no apoiu ba implementasaun projetu estratéjiku sira iha área promosaun investimentu, dezenvolvimentu Pequenas no Médias Empresas (PME), promosaun esportasaun, no inisiativa seluk ba dezenvolvimentu ekonómiku.
SCE mós fahe ninia esperiénsia internasionál iha implementasaun projetu sira iha nasaun oioin, inklui Sri Lanka, Ruanda, Fiji, Maurísius no seluk tan. Esperiénsia hirak ne’e fó énfaze ba área hanesan modernizasaun administrasaun públika, dezenvolvimentu sistema eletróniku governamentál, no implementasaun mekanizmu komérsiu kárbonu atu apoia esforsu mudansa klimátika.
Iha oportunidade ne’e, SCE reafirma ninia kompromisu atu apoiu Timor-Leste liuhosi programa formasaun, servisu konsultória no asisténsia téknika hodi reforsa kapasidade instituisaun públika no rekursu umanu iha área prioridade sira.
Enkontru ida ne’e, demonstra kompromisu TradeInvest Timor-Leste no Enterprise Singapore atu hametin parseria institusionál, atrai investimentu estranjeiru, promove dezenvolvimentu kapasidade hodi kontribui ba kresimentu ekonómiku sustentável no inkluzivu iha Timor-Leste.
