Prezidente Tribunál Rekursu, Afonso Carmona hateten, Tribunal seidauk foti desizaun ba Lei Pensaun Mensal Vitalisia, tanba prosesu la'o hela, maibé bainhira iha desizaun ne'e, juis titulár mak ka’er.

“Prosesu la'o hela, agora bainhira-bainhira juis titulár mak kaer-ha'u la hatene bainhira, tanba ita atu dekreta inkonstitusionál ka lae ne'e prosesu ida liga ho legál ne'e... Imi hein uitoan la di'ak ka!,” Deklara Afonso ho lian síniku, iha Prezidensia Repúblika, Bairru-Pité,  foin lalais.

Nia esplika, laliu prazu, tanba importante nia andamentu ne'e mak labele liu prazu, tanba orsida buat ne'e nulu, mas agora nia andamentu tuir hela ne'e, entaun hela de'it juís nia desizaun ne'e laiha ligasaun ho prazu, imi hakarak lalais loos ka la'e, di'ak.

“Tan ne'e mak ita halo lalais Supremu Tribunál Justisa kapasita juís sira, nune'e buat hotu-hotu la'o lalais tuir imi nia hanoin," Nia hakotu.

Molok ne’e, Portavoz Estudante Universitáriu Timor-Leste (EUTL), Natalino Nunes Martins, husu ba Tribunál Rekursu atu deklara konstitusionalidade ba revogasaun Lei Pensaun Mensál Vitalísia ba públiku.

“EUTL husu Tribunál Rekursu deklara konstitusionalidade ba lei númeru 7/2025, 29 setembru, ne'ebé halakon Lei Pensaun Mensál Vitalísia ne'e,” Dehan nia.

 Portavós dehan, relativamente ho revogasaun LPMV ne'ebé sai polémika, iha-neʼebé eis-ministru no deputadu sira hatama pedidu fiskalizasaun abstrata susesiva ba Tribunál Rekursu hodi haree kestaun legalidade, tanba benefisiáriu sira lamenta ho revogasaun ne'e no konsidera inkonstitusionál.