Ministru Kombatente Libertasaun Nasionál Gil da Costa "Oan Soru" hatete, iha tetu orsamentál ba tinan 2026, liu husi proposta ne'ebé ministériu aprezenta ba Komité Revizaun Orsamentál (KRO) propoin orsamentu millaun $201, no la husu adisional tanba orsamentu ne'e sufisiente ona.
"Ami nia orsamentu la iha adisionál, orsamnetu tuir de'it tetu fiskal ne'ebé mak ba ami, ami mai ho ida ne'e de'it. Ami nia tetu fiskal millaun $201 no ida ne'e sufisiente ona," dehan Oan Soru ba Jornalista sira iha Resintu Ministériu Finansas, Kurta (06/07).
Ministru hatutan, husi montante orsamentu ne’e sei aloka programa sira ne'ebé liga liu ba asuntu veteranus nia hanesan, konstrusaun jardim ba herois sira, haloot mate restu sira ne'ebé mak seidauk haloot no kontinua pensaun veteranus sira nian.
"Ami nia programa ita boot sira hatene hela, maibé nia asuntu mak ida ne'e, ninia asuntu seluk mkankontrusaun ba jardim herois sira, restu mortais iha teritoriu tomak hamutuk rihun 12 resin, ne'ebé desde governu IV to’o agora ita foin mak hakoi mate restu rihun 24 no hela rihun sanolu resin ita seidauk haloot," Ministru esplika.
Nia akresenta, orsamentu sei kontinua halo konstrusaun ba jardim sira ne'ebé dadaun obra la’o maibé seidauk hotu tanba governu sei kontinua jardim ba herois sira iha teritoriu laran tomak. Tanba kontinua ne'e prevee osan.
