"Ha'u hanoin fulan ida ne'e, iha semana ida ou rua tan, tanba sei iha ajustamentu ba iha sistema aprozionamentu, ne'ebé ha'u hanoin iha ona solusaun, hein katak semana ida ou rua sei aselera", dehan Ministru MAKE, Joaquim Amaral ba jornalista Online INDEPENDENTE, Iha Parlamentu Nasional, segunda ne'e (09/06).
Nia dehan, fó ona instrusaun ba ekipa sira bele aselera programa sesta bázika faze daruak ne'e, hodi halo Lansamentu iha fulan ida ne'e nia laran.
"Ita mantein dadus anterior, hodi ita atualiza, se karik iha mudansa ajusta de'it, maibé ita servisu ho dadus anterior nian lai, tanba uluk mós iha reklamasaun, entaun ita sempre nakloke ba iha ajustamentu dadus, bainhira hein dadus benefisiáriu foun, entaun tempu la biban," tenik nia.
Entretantu, molok ne’e, Ministru Prezidensia Konsellu Ministru (MPKM), Fidelis Manuel Leite Magalhães hateten, Dekretu Lei ida ne’ebé mak introdus alterasaun sira ba medida reforsu distribuisaun sesta bazika ba familia ne’ebé presiza liu apoia intervensaun governu nian.
“Ho projetu Dekretu-Lei ne’e, Governu hakarak kontinua fó produtu nesesidade dahuluk nian, ba, iha sorin seluk, atu garante sustentabilidade família sira nian, no iha tempu hanesan atu kria kondisaun normalidade ba atividade produtór no operadór ekonómiku nasionál sira nian tanba prokura menus,” dehan nia, hafoin reuniaun Konselu Ministru iha Palasiu Governu, foin lalais.
Nia haktuir, sesta bázika ne’e fiksa ho valór másimu $50 ba membru ida-idak iha uma-kain benefisiáriu no sei distribui durante tinan 2022. Sesta bázika ne’e kompostu husi produtu ai-han no sasan ijiene pesoál, hanesan deskrisaun, kuantidade no folin sei define liu husi despaxu konjuntu membru Governu sira ne’ebé responsavel iha área komérsiu no indústria no kooperativa sira.
Medida Sesta Bázika ne’e limite ba ema sira ne’ebé presiza liu apoia ai-han, hanesan hakerek ona iha “Livru Rejistu Uma Kain nian.” Ba sidadaun sira ne’ebé ho titulár órgaun soberania no titulár kargu Diresaun ka Xefe Departamentu sira husi servisu Administrasaun Públika direta ka indireta estadu nian la inklui iha lista benefisiáriu nian.
