"Sei kontinua levantamentu hodi haree dalan saida mak ita bele apoiu sira," dehan PM Taur, iha Palasiu Prezidensiál Bairru-Pité, horisehik.

Nia dehan, dadus provizóriu ba vitima inundasaun iha 700 to’o 900 no família uma kain liu 30 mak daudaun ne'e evakua, maibé ne'e provizóriu de'it no seidauk iha dadus final.

Sekretáriu Estadu Protesaun Sivil (SEPS), no elementu sira servisu diresaun apoiu dezastre natuais sei halo hela levantamentu atu haree loloos dadus populasaun hira mak afetadu depois governu bele mobiliza rekursu hodi apoiu sira.

Nia hatete, iha dalan rua atu Governu apoiu vitima inundasaun, ida mak apoiu família sira. Seluk mak apoiu ba iha reparasaun ba estragu fíziku.

Konsulta Populár

Alende ne'e, Xefe Governu ho Xefe Estadu ko'alia kona-ba atividade Governu nian no ne'e inklui inisiativa Xefe Estadu nian ne'ebé, iha Sábadu (9/7) sei ba halo konsulta populár ho komunidade iha Ermera kona-ba kafé.

"Ha'u promete hanesan konvidadu, mós ha'u promete ba Xefe Estadu atu partisipa iha inisiativa ne'e ho Ministru sira balun, atu ko'alia ho komunidade no rona komunidade sira nia preokupasaun," tenik nia.

Entretantu, observasaun diariu ne’e iha terenu, hafoin remata enkontru semanál entre Prezidente Repúblika ho Primeiru Ministru tun husi eskada, akompaña husi Xefe Estadu mai husik hela fatin entrevista nian mak Xefe Estadu fila-fali ba nia fatin.