Taur haktuir, maske joven sira ne’ebé oras ne’e servisu iha rai liur maioria estudante, maibé ida ne’e sei la prejudika rekursu umanus iha rai laran, tanba oportunidade ba servisu iha rai liur hanesan eskola ida ba sira.
“Ita hotu hatene, nasaun foin ukun tinan 20 nia laran no laiha kapasidade atu kria servisu ba ema hotu, entaun dalan ida mak buka servisu iha rai liur,” informa Taur Matan Ruak ba Jornalista sira, hafoin enkontru semanál ho Prezidente Repúblika, José Ramos Horta iha Palasiu Prezidensiál, Bairu-Pite, (09/06).
Taur argumenta, aliende Súl Korea no Austrália, Governu mós buka esplora oportunidade iha fatin seluk hanesan Inglatera, Thailandia no Japaun, tan ne'e governu sei halo esforsu tomak hodi kontinua apoiu joven sira.
Realmente la fasil, tanba sira husik hela rai moris fatin no familia, maibé sira maka heroi tanba fó kontribuisaun makas ba dezenvolvimentu nasaun.
“Hanesan imi hatene iha 2021, traballadór Timor oan ne’ebé servisu iha rai liur konsege hatama osan mai rai laran hodi hadia kresimentu ekonómiku hamutuk millaun $ 121,” dehan Taur.
Antes ne'e, Deputadu Bankada KHUNTO, Luis Roberto hateten, komprimisu polítika kona ba haruka traballadór ba servisu iha rai liur ne’e, lideransa sira hakarak atu hamamuk nia ema iha rai-laran.
“Ida ne’e hatudu katak, lideransa sira iha Timor labele kria kampu servisu ba Timor oan sira atu servisu iha rai-laran.ne’e duni, ha’u husu ba estadu atu kria kampu traballu ba joven sira, nune’e hamenus númeru joven sira ba buka servisu iha rai liur,” dehan Luis Roberto.
Nia haktuir, iha loron 7 foin lalais joven barak hadau malu atu ba tuir teste lian Koreia no rejulta ema balun hetan kanek, entaun Governu tenke hanoin ona, oinsá bele kria kampu servisu ba sidadaun hotu iha rai-laran, se la’e kada tinan ema barak maka sei ba hotu rai liur.
Entretantu Deputadu FRETILIN, Fabião Oliveira rekoñese, Governu seidauk kria kampu servisu ba Timor-oan hotu, maibé pelemenus joven balun bele servisu ona iha Portu Tibar no fatin seluk tan.
“Joven sira ne’ebé ba servisu iha rai-liur tanba tuir ona formasaun lian Inglés no lian Koreia. Sira mós hatama reseita bo’ot ba Estadu, tan ne’e mak ita presiza halo balansu, tanba kuandu sira servisu iha rai laran sei la hatama reseitas ba Estadu,” dehan nia.
