Hahú iha fulan Dezembru 2021 to’o fulan Maiu 2022, Tane Konsumedór halo peskiza ba folin nesesidade baziku sira iha merkadu.
Husi peskiza refere, Tane Konsumedór konsege identifika super merkadu iha kapital Dili ne’ebé fa’an nesesidade sira, liu-liu mina-sona no foos, ho folin baratu liu.
"Ami aproveita ho folin sasan sa'e maka’as atu fó sai rezultadu peskiza ne'e atu konsumidor sira bele hatene fatin ne'ebé mak baratu liu atu ajuda konsumidor sira bele eskolla ne'ebé asertada no asesivel,” informa Portavoz Tane Konsumedór, Rosalino da Conceição Soares liu husi konferensia imprensa iha nia knar-fatin, Vila Verde, Segunda (09/05).
Ba tempu ohin loron nian, nia hatutan, tanba konsumedór hotu-hotu preokupa kona-ba folin mina-sona, nune’e nia parte fó sai kona-ba folin mina-tein bazeia ba peskiza ne’ebé sira halo.
Tuir dadus, nia dehan, folin mina-tein ne’ebé baratu liu fa’an iha super merkadu Leader ho folin $3.50.
Folin refere baratu liu kompara ho folin mina-sona iha fatin seluk hanesan super merkadu Grasa Komoro ho folin $3.60, W Four ho folin $4.00, no Dili Mart ho folin $3.75.
Aleinde mina, Tane Konsumedór mós halo peskiza ba folin foos.
Iha peskiza ne’e hatudu folin foos ho kilograma 20 ne’ebé fa’an iha fatin tolu ho folin baratu liu.
Loza Komoro Grasa, Loza Bidau Sentru Frasco no Leader fa’an ho folin $13.50, enkuantu fatin sira seluk hanesan W Four Audian ho folin $15.50, no Meimart $14.00.
Tuir informasaun ne’ebé Jornalista INDEPENDENTE asesu, kompaña Perisos ne'ebé durante ne’e importa mina-sona mai Timor-Leste daudauk ne'e stok mamuk.
Entretantu, kona-ba kestaun mina-sona, Ministériu Kordenadór Asuntu Ekonomia, Joaquim Amaral, fiar katak Indonézia sei importa mai tanba desizaun taka esportasaun mina-sona ne’e provizoriu de’it.
"Ita hein katak medida sira ne'e temporál de'it, bele fulan neen sira (Indonezia) bele halo fila fali (esportasaun) tanba ne'e impaktu komprimisiu sira nian, ita sosa kiik maibè nasaun sira seluk sosa boot ne'ebé ha'u fiar katak folin mina bele normaliza lalais," dehan Ministru Joaquim.
