Diretór Nasionál Gabinete Lisensiamentu Regitu Atividade Saúde, Nuno da Costa de Jesus hatete, dadaun ne'e empreza Star King halo ona konsultansaun ho Ministériu Saúde kona-ba rekejitus sira atu harii ospitál.

"Cheek list ami fó ona ba sira hodi halo kompleta sira-nia dokumentu hotu, mas neste momentu ami seidauk simu sira-nia dokumentus hotu," dehan nia, iha knaar fatin, Kaikoli, horisehik.

Molok ne'e, Diretór Empreza Star King, Lay Siu Hing hateten, sira-nia ospital prontu servisu hamutuk ho Governu Timor Leste hodi halo tratamentu saúde iha rai-laran.

“Bainhira ospitál ne’e prontu mak Governu hakarak atu servisu hamutuk ho Star King ami prontu, nune’e bele fó atendimentu liu-liu sira ne’ebé kbiit laiha atu ba rai-li'ur, bele halo tratamentu iha ne’e,” dehan nia.

Lay hatutan, kontrusaun ne’e to’o agora iha ona 98% hela deit lift mak seidauk, kona-ba orsamentu ba konstrusaun ne’e rasik hamutuk tokon US$ 15.

"Ita-nia ospitál ne’e foka ba iha tratamentu espesializada sira hanesan fuan, neorolojia, kankru no mós kemoterapia sira," tenik nia.

Nia afirma, ospitál ne’e  empreza rasik mak halo no ba oin haree to'ok ho Governu hakarak servisu hamutuk, entaun bele atende pasiente sira iha ne’e.

"Harii ospitál ne’e ami mesak, maibé ba oin mak haree tok Governu hakarak servisu hamutuk, mak pasiente balun hakarak bele atende iha ne’e, ita bele atende, tanba iha ne’e kuartu hamutuk 48 husi ne’e sala VIP lima no VVIP ida no  kuartu jeral kama hamutuk 87," nia afirma.

Nia informa médiku espesialista sira ne’ebé mak atu halo atendimentu ba pasiente sira iha ne’e, balun sei mai husi rai li'ur hanesan Cuba, Indonezia, Malazia no inklui espesialista timoroan  sira.

“Ekipamentu ne’ebé mak sei utiliza iha ospitál ida ne’e mak hanesan, Magnetic Resonance Imaging (MRI), CT-Scan, Catlap, X-ray, depois iha tan buat seluk mak ita haree tan, tanba ne’e ita atu prepara ospitál atu ativu ne’e, iha fulan Abril nia laran, maibé makina hanesan MRI seidauk to’o mai, entaun  muda fali ba maiu- Juñu mak ospitál ne’e ativa,” nia konklui.

Star King Medical Center hahú prepara nia rekursu umanu hamutuk 120, nune'e bainhira ospitál ne’e loke bele fó asisténsia ba pasiente no komunidade sira ne'ebé hakarak ba halo tratamentu.

Husi funsionariu 120 ne’e kompostu husi enfermeira, parteira no mós doutór  sira maibé seidauk konta espesialista na’in tolu ne’ebe  husi estranjeiru.

“Espesialista na’in tolu ne’e ita sei halo kontaktu ho sira, bainhira sira mai to’o ona iha Timor-Leste mak ita foin halo kontratu ho sira, tanba parte Star King Medical Center prepara ona karta ba Ministériu Saúde hodi hetan lisensiamentu no sei haruka funsionáriu na’in 11 hodi ba pratika iha Hospitál Nasionál Guido Valadares (HNGV), atu eleva funsionáriu sira-nia konesimentu ba iha Farmásia, Laboratóriu no Banco de sangue," nia dehan.

Kona ba ekipamentus médiku sira hahú halo instalasaun ona bainhira funsionáriu ne'e los ona bele utiliza hodi fó atendimentu.

Iha fatin seluk Diretór Servisu Apoiu Diagnóstiku no Terapéutiku HNGV, Vidal de Jesus Lopes hateten, Star King nia dirijente sira halo ona sorumutu ho dirijente HNGV hodi halo akordo tékniku ba funsionáriu sira ne’ebe atu mai aprende iha HNGV.

“Sira ne’e mai atu aprende eleva sira nia koñesimentu no kapasita sira nia skill iha ospitál hodi hein sira nia lisensiamentu husi Ministériu Saúde, banhira sira hetan ona lisensa, tanba prosesu ne’e lao hela” dehan nia.

Nia dehan tuir informsaun husi sira katak sei halo insatalasaun makina sira ba Star King Medical Center ne’e lao hela no prosesu ba lisensiamentu mós lao hela.