Tuir Tekniku Espesializadu ba Monotorizaun no Avaliasaun, SASCAS, José da Silva, hateten, formasaun ne'e, atu fasilita diak liu tan membru sira nia servisu bainhira implementa programa auditoria sosial ho diak, iha kapital no iha nivel munisipiu.

Nia hatutan, materia ba formasaun ne’e foku liu ba iha area edukasaun, saúde, infraestrutura báziku, agrikutor no mós asunto sosial, ne’ebé liga ho programa bolsa da mãe.

“Formasaun ninia konteudu ne’e oinsa fasilita membru sira ne'ebé implementa programa auditoria sosial oinsa bele komprende matadalan ba programa refere,”dehan nia iha Salaun HAK, sesta ne’e (02/09).

Tuir nia, programa refere iha instrumentu foun ba sosiedade sivil sira, tanba sosiedade sivil mós monitoriza Governu nia servisu.

Aleinde, halo auditoria ba projetu sira ne’ebé Governu oferese ba povu no mós servisu ne’ebé liga ho atendementu publiku nian.

Enkuantu, orsamentu ba implementasaun programa auditoria sosial, ba tinan ida ne’e hamutuk dolar amerikanu tokon $1.3.

Nia informa, formasaun ne'e sei konsentra ba organizaun sosiedade sivil iha munisipiu Dili no tuir planu ba nivel munisipiu sei hala'o iha semana oin.

Iha fatin hanesan, Koordenador Konsellu Diretiva Auditoria Sosial, Justino da Silva, afirma, formasaun ne'e tuir deit ba matadalan auditoria sosial ne'ebé dezenvolve ona, tanba iha matadalan ne'e, koalia liu ba prosesu oinsa mak halo monotorizaun no peskija sira.

"Bainbira hetan informasaun husi komunidade sira nia preokupasaun hodi halo analiza no uza kna'ar ida liu husi forum hodi aprezenta relatoriu sira ba Gabinete Primeiru Ministru hodi bele tulun,"nia esplika.

Entretantu, organizaun sosiedade sivil ne'ebé partisipa iha formasaun refere mak hanesan, Plataforma Nasional Bee Saniamentu no Higene, AHDMTL, GFTL, ACF, Rede Feto, HAK,  Organizaun Joventude, Renetil no seluk tan.

Enkuantu, kada organizasaun iha membru na’in rua no formasaun refere hala’o durante loron ida.