Loron Segunda no Tersa situasaun gravé tebes. Deputadu sira haklalak hadau malu kadeira, Deputadu husi partidu CNRT dere meja, baku fila meza no baku fila kadeira, enkuantu Deputadu sira husi partidu tolu, FRETILIN, PLP no KHUNTO kontinua obriga halo eleisaun ba meza Parlamentu Nasionál.
Maibé ba loron-ohin, Prezidente Parlamentu Nasionál sesante, Deputadu Arão Noe Jesus Amaral kumpri desizaun votasaun ba substitusaun Meza-Parlamentu Nasionál.
Deputadu Arão dehan, relasiona ho votasaun meza PN, CNRT kontinua halo rekursu ba Tribunál Rekursu tuir regras legais.
“Só ke ha’u lamentavel oituan ba eleisaun ida ne’ebé mesmu ema hili ketua klas iha eskola sei formal no sei fó dignu. mais eleisaun Prezidente Parlamentu nian hanesan loos merkadu ida ne’e mós realiza, mais prontu buat hotu submete ba desizaun ita hein orgaun seluk nia kompetensia,”dehan nia, iha sala Bankada CNRT, Kinta (21/05).
Nia dehan, kapasidade nuudar Deputadu sei la lakon, knaar Deputadu nian sei halo servisu hanesan baibain, hodi hein desizaun Tribunál Rekursu.
Tanba tuir nia katak, nasaun Direitu demokratiku buat hotu sei bazeia ba konstitusionál.
Entratantu tuir observasaun jornalista INDEPENDENTE Online nota katak, ambiente atividade Presidente Parlamentu Nasionál sesante la hanesan babain ona. Babain nia mai ho karreta Presidente Parlamentu Nasionál nian, akompaña ho nia eskoltu no antes atu ba plenaria, sei ba uluk nia sala servisu Gabinete Presidensia Parlamentu Nasionál.
Maibé kinta ohin, nia tama servisu mai ho uza karreta Deputadu babain, akompaña ho eskoltu balun de’it, no nia hakat tama ba sala Bankada CNRT nian.
Iha sala PPN sesante troka ho Presidente Parlamentu Nasionál eleitu Aniceto Guterres ho nia vise na’in rua.
PPN foun ho nia vise hala’o hela primeiru enkontru iha sala Gabinete Presidensia Parlamentu Nasionál.
Presidente Parlamentu Nasionál eleitu, Aniceto Guterres ho nia vise na’in rua hetan votus maioria afavor 40, kontra 0, no abstensaun 0, iha tersa (19/5).
Fó votus afavor ba meza PPN ne’e husi Deputadu partidu FRETILIN, PLP, KHUNTO no Partidu Demokratiku.
