Primeiru-Ministru Singapura, Lawrence Wong hateten ida-ne’e iha ámbitu enkontru bilaterál ho Primeiru-Ministru (PM), Kay Rala Xanana Gusmão iha Ministériu Relasaun Esteriór Singapura, segunda (14/07/2025).

“Bemvindu ba PM Timor-Leste Xanana Gusmão iha Singapura. Singapura hein atu simu Timor-Leste iha família ASEAN no aprofunda ita-nia parseria iha tinan hirak oin mai,” Primeiru-Ministru Singapura liu husi komunikadu ne'ebé online INDEPENDENTE asesu iha Pájina ofisiál Primeiru-Ministru Kay Rala Xanana Gusmão (15/07).

Singapura ho Timor-Leste nu’udár belun di’ak iha tempu naruk nia laran. Singapura apoia Timor-Leste nia esforsu hodi harii nasaun nian iha inísiu, no haburas bebeik parseria dezde tempu ne’ebá, to’o estabelesimentu Embaixada rezidente Singapura nian iha Dili tinan kotuk.

Lawrence Wong konsidera vizita Primeiru-Ministru Xanana Gusmão nian ne’e, hala’o bainhira Timor-Leste prepara-an atu adere ba ASEAN iha tinan ida-ne’e nia rohan.

“Ami halo diskusaun di’ak kona-ba hametin kooperasaun bilaterál, inklui iha dezenvolvimentu rekursu umanu no kapasitasaun,” nia hateten.

Atu marka marku ida-ne’e, Singapura sei lansa Pakote espesiál stars hodi apoia Timor-Leste nia integrasaun iha ASEAN no nia dezenvolvimentu ba tempu naruk.

Reuniaun bilaterál ne’e, PM Xanana akompaña hosi Vise-Primeiru-Ministru ne’ebé ezerse mós funsaun hanesan Ministru Koordenadór Assuntus Ekonómikus no Ministru Turizmu no Ambiente, Francisco Kalbuadi Lay; Ministru Negósiu Estranjeiru no Kooperasaun, Bendito dos Santos Freitas; Vise-Ministra bá Assuntu ASEAN, Milena Maria da Costa Rangel; Sekretáriu Estadu Komunikasaun Sosiál, Expedito Dias Ximenes; Embaixadór Timor-Leste iha Singapura, Alexandre Tilman no Xefe Gabinete Primeiru-Ministru, Elizabeth Exposto.