Inisiu jogu, bainhira arbitru lian, ekipa rua ne’e hala’o jogu kuidadu tebes liu-husi hametin liña defensivu, maibe ekipa MAPPF ne’ebé mak hatudu ritmu jogu di'ak tebes no kordernasaun jogador ne’ebé diak, konsege domina liu bola hodi aproveita hodi sobu liña defeza ekipa Sinarmas ni’an.
Minutu kontinua ne’ebé la’o, ekipa rua ne’ebe halo jogu husi ain ba ain, hodi buka hatama golu, hodi bele muda score, nune’e iha minutu 11 ekipa Sinarmas liu husi nia jogador Renato Galhos, ho númeru kamizola 21 konsege fura rede ekipa MAPPF ni’an hodi muda score ba 1-0.
Hafoin muda score foin liu minutu 1 de’it, iha minutu 12 ekipa MAPPF liu husi nia jogador Reinaldo Alves, ho númeru 7 konsege resposta golu ida ba nia adversariu hodi muda score ba 1-1.
Score impata ne'e, obriga ekipa rua atu servisu maka’as liu tan, atu hatama tan golu ruma, ho husi esforsu sira ne’e, iha minutu 18 ekipa MAPPF liu husi nia jagadór, Inacio Belo ho númeru kamizola 27 konsege aumenta tan golu ida, hodi muda score ba 2-1.
Rezulta sofre golu ida, Ekipa Sinarmas la lakon esperansa, nafatin esforsu hodi halo kontra atake ba nia adversáriu, nune’e foin to’o de’it minutu 19, liu husi nia jogador Ilidio ho númeru kamizola 7 resposta kedan golu ida, hodi muda score ba 2-2 to’o primeira parte termina.
Tama ba segunda parte, ritmu jogu komesa manas liu tan, ekipa rua ne'ebe lansa kontra atake ba malu, ho tatika ne’ebé ekipa ida-idak iha, nune'e bele buka oportunidade hatama golu.
Nune’e, foin to’o de’it minutu 22 ekipa MAPPF halo kontra atake no konsege rezulta golu ida ne’ebé marka husi jogador Filipe ho númeru kamizola 55, hodi muda score ba 3-2, rezultadu ne’e, halo ekipa MAPPF hasa’e liu tan ritmu jogu, hodi buka aumenta tan golu rede adversáriu.
Maske nune’e, husi esforsu ne’e ho difikuldade oi-oin iha kampu laran, maibé ekipa rua nafatin lansa ameasa ba guarda rede ida-idak. Iha minutu 28, jogador Reinaldo Alves ho numeru kamizola 7, konsege aumenta tan golu ida hodi muda score MAPFF ba 4-2.
Rezultadu ne’e, adversariu jogu Sinarmas koko atu sai husi presaun nia laran hodi halo kontra atake ba ekipa MAPPF, hodi lansa sutu balun, maibe sei salva husi guarda rede MAPPF ni’an, maibé nafatin servisu maka’as ho disipliña, pasa bola ba malu, tuir tátika no tékniku ne’ebé sira iha.
Ho esforsu sira ne’e, iha minitu 30, Sinarmas konsege marka tan golu ida liu husi nia jogador Ilidio ho múmeru kamizola 7 muda score 4-3.
Husi golu ne’e, Sinarmas hasa’e liu tan ritmu jogu hodi halo barollu iha defeza MAPPF ni’an, nune’e iha minutu 31, jogador Aquino Ximenes hatama tan golu, muda score 4-4. Liu de’it minutu ida, iha minutu 32, Ilidio kontribui tan golu ida, muda escore impata jogu ho score 4-5 Sinarmas.
Ho rezultadu ne’e, halo jogador sira husi ekipa rua tenke esforsu maka’as liu tan, ho tatika no teknika ne’ebe orienta husi treinador ida-idak, nune’e ho orientasaun sira ne’e, ekipa Sinarmas la husik let de’it, konsege uza oportunidade sira ne’e, iha minutu 34 liu husi nia jagador Ilidio, konsege produs tan golu ida, hodi muda score ba -4-6
Ho score ne’ebé iha, obriga ekipa MAPPF atu esforsu maka’as liu tan, atu bele responde golu ruma, maibé ekipa Sinarmas la fo fatin, nune’e Sinarmas halo kontra atake liu husi nia jogador Juvilino Saldaha, produs tan golu ida hodi muda score ba 4-7 to’o segunda parte termina.
Purtantu, rezultadu ne’e, Ekipa Sinarmas sai kampaiun ba jogu futsal BNCTL Cup 2025 ho totál orsamentu rihun $5 ho taxa, ekipa MAPPF okupa segundu lugar ho orsamentu rihun $3 no terseuru lugar okupa husi MESSK ho orsamentu rihun $2.
Enkuantu, jogu Femenina, BTL,E.P sai hanesan kampiaun ho orsamentu rihun $5 ho taxa, Segundu lugar okupa husi ekipa Telemor ho osan rihun $3, ekipa Ministériu Asuntu Kombatente Libertasaun Nasional (MAKLN) okupa iha terseiru lugar ho osan rihun $2.
