Kazu joven ida, José Bernardo de Jesus Soares, ne’ebé mate ho kondisaun tali iha kakorok iha sela detensaun Komando Polisia Nasionál Timor-Leste Munisipiu Dili hamosu deskonfiansa ba servisu autoridade seguransa ne’e.
Vise Prezidente Bankada PLP, Francisco de Vasconcelhos deskonfia kazu ne’ebé mosu iha sela detensaun PNTL Kaikoli ne’e laos tara an.
"Se husu ha’u-nia opiniaun pesoal, primeiru kedas ha'u dehan ne'e sala, tanba deklarasaun sira ne'ebé mak nia família sira halo ne'e, ita la presiza investigasaun mós ita hatene ona katak nia mate, kauza ida mak sira halo agresaun fízika ruma, ne'e mak nia mate," deklara Vasconcelhos iha Parlamentu Nasionál, Segunda (05/09).
Tanba, deputadu ne’e hatutan, nia la fiar tali ne'e derrepente mosu iha sela laran, tanba sela ne'ebé de'it tenke haree didi'ak sasán sira labele iha laran hodi fó périgu ba ema-nia vida.
"Fatin ne'e aat duni, maibé fatin ne'e o labele foti buat ida atu fasilita o atu halo aktu ruma, ne'e labele. Maibé tali iha fali ne'e ita tenke husu polísia atu responsabiliza ida ne'e," katak nia.
Deputadu ne’e mós kestiona kona-ba deklarasaun katak CCTV la funsiona kleur ona.
Nia deskonfia, iha jogada balun husi pesoal polísia atu halakon evidensia hanesan mós ho kazu Ferdy Sambo ne’ebé akontese iha Indonezia.
"Ha’u rona informasaun Prokuradór no Juiz sira hatete ba ha'u katak iha faze rua mak ita hakat liu tiha; ida mak bainhira ema-nia oan ne'e mate, iha faze rua la halo investigasaun."
Ho kazu ne'e, tuir nia, públiku nia konfiansa ba PNTL bele lakon, tan ne’e labele husik atu públiku ne'e lakon konfiansa.
“Uma ves lakon konfiansa, estadu laiha autoridade ona, independente hanesan polísia nu'udar autoridade garante seguransa, ninia integridade no autoridade oinsá, ne'e taruhan”.
Entretantu, relasiona ho kazu mate iha sela Kaikoli, Komandu Jeral PNTL deside halo ona suspensaun ba membru PNTL na’in 8 hodi submete ba iha prosesu invetigasaun.
Portavos Komandu Jeral PNTL, Superintendente Xefe Armando Monteiro informa, Komandante Jeral PNTL, Komisariu Faustino da Costa, hasai despaixu urjente ida ho Numeru 365/CG-PNTL/IX/2022, hodi nomeia ofisiál PNTL na’in haat (4) hodi halo investigasaun internal urjente ba kazu ida ne’e.
