Tuir Sekretáriu Estadu Protesaun Sivil (SEP) Joaquim Gusmão hateten, akontesimentu dezastre naturais iha Munisipiu Baukau, suku Bukoli iha aldeia tolu mak hetan estragus, hanesan, aldeia Waisemo, Makadai de Baixo, no Lulihene.

"Ita simu ona dadus provisoriu ne'ebe ita hetan husi familia dezastre naturais ne'ebe afetadu, iha familia hamutuk na'in 104 no uma ka'in 57, dapur 10, uma adat 5 no eskola EBF Bukoli nian", dehan nia ba Online Independente iha nia kna'ar fatin kaikoli, kinta ne'e (23/12).

Nia hateten, dadus vitima hirak ne'e sei provisoriu, tanba komunidade barak mak hela besik malu, sei haree mos ba vitima sira iha suku seluk ne'ebé afetadu.

"Ekipa agora iha ona terrenu sira verifika ona dadus, ekipa sira husi Cruz Vermela, no lider munisipal nian, hamutuk autoridade lokal sira sei verifika hela dadus vitima sira nian",katak nia.

Enkuantu hafoin akontesimentu ne'e husi parte SEPS nian apoiu ona, fos no hahan no nessidade basika balun ba iha Komunidade afetadu sira hodi bele aguenta.

"Ohin mos ita nia ekipa husi sentu operasaun Dili nian haruka tan balun ba iha Munisipiu Baucau, tanba munisipiu Baukau nia sasan balun komesa menus ona",dehan Joaquim.

Ba sasán ne'ebé sentru operasaun Munisipiu Dili, haruka ba munisipiu Baukau mak hanesan, supermi, susuben, fos no sasan nesesidade basika seluk tan, para hodi bele tulun vitima sira.

Tuir nia, atu fo apoiu ba vitima dezastre naturais, SEPS uza Dekretu Lei foun ho númeru 7/2021 Kona-ba apoiu ba Vitima Dezastre Naturais.

Tuir Dekretu Lei Foun número 7/2021, haktuir tuir item por item ne'ebé SEPS uza hodi apoiu ba vítima dezastre naturais sei aumenta tan, hodi bele fó atensaun diak ba komunidade sira.

"Dekretu Lei Foun ne'e iha mudansa oituan item food mos ita sei aumenta sasan ka nesesidade ba ita nia inan feton sira, hafoin uma sira ne'ebé estraga ka ita konsidera uma hela fatin Hanesan bainbain iha tipu mak hanesan estragus total , estragus grave no estragus kaman",dehan Joaquim.

Nune'e Dekretu lei foun ne'e sei vigor iha tinan oin iha orsamentu Jeral estado Tinan 2022 Nian ,mak foin bele ezekuta hodi selu vitima sira.

"Item ne'e ita sei aumenta tan uluk apoiu kalen 25, agora aumenta ba tahan 50 nomos semente uluk item 1, hetan 25 sakas maibé agora mós ita aumenta tan,"nia esplika.

Governante ne'e esplika tan, aleinde iha mudansa iha pakote item food no item non food, iha mudansa mós ba menu da obra ho aikuadradu ne'ebé antes ne'e apoiu osan dolar amerikanu $300.00 Dólar aumenta ba $1000.

"Menu da obra ne'e atu selu ba badaen sira no aikuadradu ne'e atu sosa aí hodi bele hari fila fali uma", tenik nia.

Entrentatu ho Dezastre Naturais akontese iha Suku Bucoli, SEPS husu ema hotu atu kuidadu aan liliu iha fatin risku ba dezastre naturais nian.

Asistente Editor: Saturnina da Costa