Vizita ne’e nu’udar parte ida husi nia vizita ofisiál dahuluk mai iha Sudeste Aziátiku, dezde asumi kargu ba knaar foun, hafoin Eleisaun Federál Austrália nian iha fulan-Maiu tinan ne’e.
Tuir komunikadu ne’ebé Online ne’e sita katak, Austrália maka parseiru dezenvolvimentu ida ne'ebé konfiável no hakat ba oin iha tempu ida ne'ebé iha inserteza globál no investe másimu iha asisténsia dezenvolvimentu no hatán ba prioridade lokál sira.
“Austrália nia programa dezenvolvimentu sira iha Sudeste Aziátiku avansa interese sira ne'ebé ita fahe hamutuk ba rejiaun ida ne’ebé seguru, estável no prósperu. Ami konsentradu ba dezafiu no oportunidade sira iha rejiaun ida ne'ebé dinámiku liu iha mundu,”dehan Komunikadu ne’ebé Online ne’e sita, segunda ne’e (04/08/25).
Entretantu, iha vizita ne’e, Ministra Aly sei hasoru malu ho líder seniór sira husi Governu Timor-Leste nian, hodi ko’alia kona-ba oinsá atu bele avansa prioridade dezenvolvimentu Timor-Leste nian, iha tempu hanesan Timor-Leste prepara daudaun atu adere ba ASEAN iha fulan-Outubru ne’e.
Iha biban hanesan, Ministra Aly sei tuir Konferénsia Ekonómika no Negósiu Timor-Leste ho Austrália nian hamutuk ho Enviadu Espesiál Austrália nian ba Sudeste Aziátiku, Nicholas Moore, no Kampeaun Negósiu Austrália nian ba Timor-Leste, Shane Walden.
Enkuantu, Konferénsia ne’e nu’udar oportunidade ida atu reafirma Austrália nia kompromisu atu halo parseria ho Timor-Leste atu atinji objetivu kreximentu ekonómiku no diversifikasaun.
