Prezidente BTL,E.P, Gustavo da Cruz, hatete, objetivu husi serimonia ne’e atu selebra loron mundiál bee moos no jéneru, tanba bee mós importante ba ema nia moris lor-loron nian. Tanba ne’e BTL sei kontinua esforsu oinsa atu halo melloramentu bee moos ba komunidade sira.
“ita hotu hatene katak bee no jenéneru ne'e maioria utilizasaun ne'e husi inan feton sira no konsidera mós bee hanesan direitus umanus, entaun oinsá mak ita bele kuidadu rekursu bee ne'ebé iha atu uza ba moris lorloron. Nune'e ho selebrasaun ida ne'e la'ós atu konsentra hamutuk hodi halo kontente malu ne'e la'e, maibé atu nafatin fó hanoin mai ita-nia obrigasaun husi entidade hotu atu fó hanoin ba malu nafatin katak bee ne'e importante tebes ba ita-nia moris Liuliu lideransa komunitária sira ne'ebé sempre simu preokupasaun husi komunidade kona-ba bee moos, nune'e iha biban ne'e ita bele fahe informasaun ba malu, BTL hamri'ik tinan lima ona no esforsu nafatin oinsá mellora bee moos ba komunidade sira,” dehan Prezidente BTL, E.P, Gustavo da Cruz, ba jornalista sira iha CNE Kolmera, Segunda (23/03).
Nia dehan, fornesimentu bee husi kanalizasaun públiku ne'ebé BTL jere foin atinje 48%, kobertura enjerál atinje 98%, signifika katak komunidade sira asesu bee moos husi fontes oioin hanesan bee posu, bee matan, nune'e sei iha servisu lubuk ida ne'ebé sira presiza mellora ka hasa'e kobertura kanalizadaun atu atinje to'o 50%.
Prezidente BTL iha okaziaun ne’e enkoraja ba komunidade sira hotu atu servisu hamutuk ho BTL atu bele garante fornesimentu bee moos ho di'ak, katak labele liga ilegál kanalizasaun bee no labele destroi kanalizasaun bee ne'ebé Governu estabelese ona.
Iha fatin hanesan, Prezidente Autoridade Munisípiu (PAM) Dili, Francisco dos Santos, akresenta, bee mak fó moris ba ema, tanba ne'e mundu tomak selebra loron bee nian tanba bee nia importánsia ba ema nia moris.
Nia haktuir, BTL foin moris tinan lima ba kotuk ho progresu ne'ebé mak iha no mós dezafius sira ne'ebé mak sira enfreta no problema ida ne'ebé mak komplexu tebetebes, liuliu iha Dili, ne’ebé tékniku sira servisu hodi hakoi kanu, ke'e kanu, monta kanu, iha Dili laran ne’e presiza servisu boot ida husi BTL servisu ida ne'ebé mak ezije BTL sira atu bele marka pasu nafatin ba oin tanba komunidade sira hein hela prestasaun servisu sira husi BTL.
“Ita bo’ot sira mak instituisaun ida ne'ebé mak importante tebetebes tanba ita bo’ot sira nia knaar ida ne'e knaar atu hatutan vida moris ema nian, ita nia parseirus barak tebetebes atu apoiu ba asuntu no área ida ne'e presiza mákina ida ne'ebé mak sólidu, presiza mákina ida ne'ebé mak servisu maka’as, hanesan Autoridade Munisípiu Dili prontu nafatin ho ita bo’ot sira atu servisu hamutuk atu bele fó bee ne'ebé mak di'ak sufisiente ba ita nia komunidade sira,” PAM Dili subliña.
Iha parte seluk Autoridade Munisípiu Dili, parseiru ida ne'ebé mak apoiu de'it maibé iha teknikamente operasionalmente husi BTL, tanba ne'e hanesan Autoridade Munisípiu Dili ho ninia komponente hotu-hotu prontu nafatin atu akompana servisu sira iha terenu.
Nia subliña hanesan AMD apresia tebes ba servisu ne'ebé mak iha progresu sira ne'ebé mak BTL hetan ona. Tanba Sidade Dili atu sai sidade ne'ebé hakmatek, moos mak presiza ema hotu nia asaun, asaun konkreta liu mak liuhusi bee.
“Servisu boot ne'ebé mak ita enfreta dadaun ne'ebé ita hotu-hotu akompana iha alargamentu estrada sira ne'e presiza ita boot sira nia aprensaun BTL tenke fó atensaun makaas tenke fó dalan alternativo ba komunidade sira para hetan nafatin bee, tanba bee mak nesesidade bázika ida ne'ebé mak fora husi ida ne'e sei la iha nesesidade seluk ne'ebé mak aas liu nia. Ita bele moris iha estrada furak, bele eletrisidade naroman bainhira bee la iha ita sei la halo buat ida, tanba ne'e BTL ba loron ida ohin ita boot sira marka tan pasu maibé labele haluha ita boot sira nia responsabilidade,” PAM Dili hatutan.
Nia dehan, AMD nu’udar parseiru ida ne'ebé mak apoiu de'it maibé teknikamente operasionalmente husi BTL, tanba ne'e hanesan Autoridade Munisípiu Dili ho ninia komponente hotu-hotu prontu nafatin atu akompaña servisu sira iha terenu.
Nune’e mós Xefe Suku Bidau Santa-Ana, Alexandriano Bras, husu ba tékniku sira husi BTL nian ne’ebé tun iha terenu atu kanaliza bee hodi tuir regulamentu ne’ebé iha atu komunidade sira hotu-hotu bele asesu ba bee moos.
“Ema hotu-hotu sempre konsumu bee tanba ne'e mak ohin ami husi Suku Dili mai partisipa iha loron mundiál ba bee nian, aleinde ida ne'e ohin mós ami rona direitamente husi Diretor sira husi BTL nian ne'ebé hato'o sira nia servisu kona-ba progresu durante tinan lima nian no mós dezafius sira ne'ebé mak sira hasoru, tanba ne'e mak hanesan Xefe Suku ami nafatin enkoraja husu nafatin ba BTL atu nafatin esforsu ita boot sira nia an liuliu ba tékniku sira ne'ebé tun direitamente ba iha terenu oinsá atu kanaliza bee atu la'o tuir nia dalan atu komunidade mós bele asesu,” nia tenik.
