Tuir observasaun Jornalista INDEPENDENTE iha Portu Tibar nota katak, dadauk ne’e iha karreta sukata 24 resin, inklui motor marka beat rua (2) kompaña hatama mai Timor-Leste.
Transporte hirak hirak ne'e tama TL iha semana hirak liu ba no oras ne'e parte Alfandega hamutuk ho DNTT halo hela inspesaun iha terrenu.
Relasiona ho asuntu ne’e, Jornalista Independente tenta halo konfirmasaun ba parte kompaña, maibé lakoi fó komentáriu. Aliende ne’e, Jornalista Independente mós seidauk bele hetan informasaun husi parte Alfandega, tanba Komisáriu Alfandega halo hela servisu iha rai liur.
Kompaña sira ne'ebé hatama karreta sukat ne’e mal hanesan, Brother Motor Unipesoál Lda, nia Diretór maka Liong Ci Cheu, fatin iha Audian.
Kompaña Alokanesi Unipesoál Lda, nia Diretór, Aloysius Kael Soares Nesi, fatin iha Motael, komapaña Alfamór Unipesoál Lda, nia Diretór, Carolino da Costa, hatin iha Metin I Komoro, kompaña Auto Zone Unipesoál Lda, Diretór Chen Youyu, fatin iha, Aldeia Zero II, Suku Fatuhada nomos kompaña sira seluk.
Bainhira Fork Lift hasai transporte hirak ne'e husi kontentór, balun nia kondisaun aat, xapa oin dodok, balun bateria mate no balun nia vidru oin kotuk rahun ona.
Hatan ba kestaun ne'e, Diretór Luta Hamutuk (LH), José Alves da Costa hateten, komapaña hirak ne'ebé hatama karreta sukata ne’e hanesan empregu ida ba timor oan sira maske mai ho kondisaun aat.
"Ita nia lei importasaun minimu tinan lima ba kraik mak permite bele tama, tanba lei ne'e la ko'alia kona-ba karreta aat sira ne'e labele tama mai, signifika Lei ( Anterior ) sei vale, "dehan José Alves ba Jornalista INDEPENDENTE via Telefone (29/09).
Nia dehan, kompaña hirak ne'e la viola lei, tanba Prezidente Repúlika seidauk promulga alterasaun ba Lei Nú.30/2011 hodi públika iha jornál repúblika.
"Lei mak regula mais agora lei laiha ne'e problema, depois ne'e laos parte nagativu de'it iha mós pozitivu tanba kria empregu iha rai laran, ema sira iha ofisina mak hetan servisu inklui mós (kompaña) selu tasa," tenik nia.
Atu Promulga Lei,Nia dehan,LH Laiha komentáriu atu PR bele promulga lalais,maibé ida ne'e fila fali ba konsensia kompaña sira ne'ebé hatama karreta.
Tanba ne'e,nia dehan,governu mós presiza haree espetu hirak ne'e atu labele haree de'it hatama karreta foun tanba ikus mai atu faan de'it.
Molok ne'e, Komisáriu Alfandega, José Abilio hatete, Lei ne'e Konsellu Ministru aprova ona iha fulan kotuk, maibé sira labele halo buat ida tanba Prezidente Repúblika seidauk promulga.
"Ita hein de'it Prezidente Repúblika promulga lei ne’e, maibé to'o agora seidauk ne’e duni ami labele halo buat ida, se lei ne’e promulga ona ita bele komesa implementa,” tenik nia iha momentu ne’ebá.
