Tuir Sekretáriu Estadu Formasaun Profisionál no Empregu, Alarico de Rosário husu, ba grupu sira atu ezekuta fundu tuir planu ne’ebé aprezenta iha proposta, tanba apoiu ne’ebé fó, bazeia ba papél SEFOPE nian, ne’ebé hakarak hadi’a ema-nia moris liu husi servisu.

“Atividade ne’ebé ohin ita halo tanba SEFOPE iha orsamentu ba apoiu auto-empregu, entaun ita-nia grupu sira ne’ebé hatama proposta atu hetan apoiu ne’e hamutuk 110 resin, maibé ema na’in-67 mak pasa ho apoiu fundu rihun $334.328,70,” dehan nia iha Edifisiu SEFOPE, Kaikoli, kuarta ne'e (10/08).

Nia hatutan, prosesu avaliasaun ne’e, komisaun ba avaliasaun proposta mak sei haree hodi indetifika ida ne’ebé merese atu hetan apoiu.

Enkuantu, orsamentu ne’ebé SEFOPE apoiu ba grupu 67 ne’e, kada grupo sei hetan osan ho montante hahú husi rihun $3.000 to’o $8.000, bazeia ba proposta husi grupu sira.

Nia dehan, grupo auto-empregu ne'ebé hatama ona proposta ba iha SEFOPE hodi hetan fundos, mai husi area oi-oin, ezemplu grupo agrikultura no mós kuda modo no seluk tan.

Nia haktuir, atividade ne’ebé grupu halo mak hanesan iha área ortikultura, hakiak ikan, ofisina, rental no agrikultór.

“Ita-nia grupu sira, antes ne’e hetan ona formasaun iha sentru formasaun, nune’e sira iha ona esperénsia hodi hala’o atividade maibé ladun la’o, entaun husu apoiu iha Governu hodi negósiu bele la’o, tanba ne’e ha’u husu imi tenke ezekuta osan ne’e ho di’ak,” nia akresenta.

Tanba ne’e, Governante ne’e dehan, sei fó sansaun ba grupu sira ne’ebé, ezekuta osan la tuir planu no SEFOPE sei foti fali hodi oferese ba grupu seluk.

Iha fatin hanesan, grupu benefisiáriu ba ofisina husi munisípiu Covalima, Firmino Gusmão, hateten, sira-nia parte hatama proposta ba SEFOPE tanba grupu eziste tinan barak ona, maibé tanba menus finansiamentu mak sira husu apoiu ba Governu, nune’e bele reativa atividade sira.

“Ami husu fundu ba SEFOPE hamutuk rihun $4.000 no grupu ne’e kompostu hosi ami na’in-lima. Ami garante katak ba oin ami sei utiliza osan ne’e ho di’ak,” nia dehan.

Enkuantu, benefisiáriu husi munisípiu Ainaro, Domingos Xavier, hateten, sira-nia grupu kompostu hosi ema na’in-lima, ho atividade harii rental.

“SEFOPE loke oportunidade ba auto-empregu nian ami kompete no liu. Agora osan ne’ebé ami hetan hosi SEFOPE ne’e hamutuk rihun $5.000, ami senti kontente, tanba osan ne’ebé ami hetan bele ajuda tan ami sosa materiál ne’ebé ami presiza,” nia hateten.

Entretantu, benefisiáriu Grupo Ridos Ribeiro, Rosilia Ribeiro, husi munisipiu Bobonaru, agredese ba Governu liu husi SEFOPE ne'ebé apoiu fundos, nune'e ba oin grupo ne'e sei halo servisu ho di'ak liu tan.

"Durante ne'e ami nia grupo halo servisu pekuaria no hakiak animal, agora ba oin osan ne'ebé ami hetan hakarak mós ajuda joven sira ne’ebé laiha servisu, hodi bele servisu”, tenik nia.

Nia akresenta, dadaun membru ne'ebe existe iha grupo refere hamutuk na'in 4, no grupo refere harii iha tinan 2019.