Sekretáriu Estadu hatete, daudaun ne'e Governu iha hela faze preparasaun, nune’e introdús bá Xefe Governu tanba expo ne’e sei partisipa hosi joven timoroan talentozu sira nu’udár marka partisipasaun dahuluk Timor-Leste nian iha eventu globál bá arte kontemporánea boot-liu iha mundu.
Aléinde ne'e mós, introdús ba xefe governu kona-ba Loredana Pazzini-Paracciani nu'udár Kuradora Pavilion Timor-Leste nian bá exposizaun Biennale di Venezia ho nia servisu maka halo selesaun no prepara artista Timoroan sira ne'ebé bele reprezenta Timor-Leste iha espozisaun ne’e.
"Oras-ne’e daudaun iha ona artista timoroan talentozu na’in-tolu mak selesionadu atu partisipa iha eventu mundiál ne’e mak hanesan Etson Caminha, Juventino Madeira ho Verónica", dehan Jorge, iha Palásiu Governu, Sábadu (15/11).
Artista na’in-tolu ne’e selesionadu liu-hosi konkursu públiku bá timoroan sira iha rai-laran no rai-liur ne’ebé aplika hamutuk na’in-35 liu-hosi submisaun dokumentu to’o entrevista.
Nune’e, sei iha aprezentasaun obra ida hosi artista Verônica ho kombinasaun múzika tradisionál Timor-Leste nian bá muzika kultura ASEAN hosi artista Etson Caminha no Juventino Madeira sei halo vídeo-mapping liga bá kultura no indetidade Timor-Leste nian.
Nia dehan, durante diskusaun ne'e, Primeiru Ministru mós husu atu prepara didi'ak obra sira ne'ebé reprezenta Timor ho kualidade.
“Primeiru-Ministru husu atu kontínua prepara didi’ak obra sira ne'ebé reprezenta identidade Timor nian ho kualidade nune'e ema iha ne'ebá bele hatene di'ak-liu Timor-Leste liu-hosi arte no kultura ida-ne'e,” SEAK esplika.
Entretantu iha abril 2024 Timor-Leste partisipa ona iha exposizasaun arte internasionál bá dala-60 ne’ebé hala’o iha sidade Biennale di Venice-Itália ne’ebé partisipa hosi nasaun 90.
Momentu ne’ebá Timor-Leste hola parte hodi promove mós obra arte konteporánea oioin no lansa filme “Kiss and Don’t Tell” ka ‘Rei no La Ko’alia’, ne’ebé prepara hosi artista Maria Madeira, apoia hosi kuradora Natalie King no ekipa produtór filme hosi Austrália, artista timoroan Alfeu Pereira ho pintór sira hosi grupu Arte Moris no Fundasaun Alola.
