Tuir Vise-Koordenadora Forsa-Tarefas ba Prevensaun no Mitigasaun Surtu Covid-19 iha Timor-Leste, Odete Maria Viegas hatete, izolamentu mak fatin ida ne’ebé atu tau pasiente sira ne’ebé laiha kondisaun.

Tanba ne’e agora dadauk iha izolamentu 12 mak ativu inklui prizaun Bekora no Tibar.

“Agora dadauk ita uza tan ótel sira hodi sai fatin Izolamentu, inklui mós prizaun Bekora,”dehan nia ba Online INDEPENDENTE, iha Ministériu Finansas Aitarak-Laran Dili, (19/05).

Fatin izolamentu 12 mak hanesan, Izolamentu Vera Crus, Óspital Antiga Lahane, Ótel Novu Orizonte, Izolamentu Tasi-Tolu, Golgota Mall, SK Ótel Metiaut, Edifisiu eskola Xina iha Bairu Formoza, Ótel Eternity Fatuhada, Edifisiu STM Bekora, uma retíru padre sira nian iha Héra, Ótel Fortuna, Ótel Surprise Manatutu.

Aliende, prizaun Bekora mós sai hanesan fatin izolamentu ba prizioneiru sira, tanba prizioneiru sira barak mak deteta positivu Covid-19.

“Iha prizaun Bekora, iha kazu positivu barak entaun ita foti prizaun sai hanesan fatin Izolamentu atu prizioneiru sira ne’ebé deteta positivu bele izola-an iha ne’ebá,”nia nforma.

Nia akresenta, izolamentu signifika, ba ema sira ne’ebé laiha kondisaun, enkuantu ba ema sira ne’ebé iha kondisaun bele izola-an iha idak-idak nia fatin ou auto-izolamentu.

Entretantu, Ótel Surprise Manatutu disponevel sai mós fatin Izolamentu, no dadauk ne’e iha ona pasiente positivu Covid-19 ne’ebé baixa iha fatin refere.

Asistente Editor: Saturnina da Costa