Francisco Jeronimo hateten iha loron 30 fulan Dezembru, Prezidente Repúblika Francisco Guterres Lú Olo promulga ona dekretu lei subsidiu liña frente ba jornalista sira, governu sei halo preparasaun iha fulan Janeiru hodi prosesa, bainhira iha ona publikasaun iha jornal republika.
“Ami halo preparasaun, fulan Janeiru ami halo prosesu, depois tama servisu hahú prosesa,” Francisco Jeronimo hateten ba jornalista hafoin partisipa komemorasaun loron eroi nasionál ne’ebé realiza iha Rotunda Nicolau Lobato, Sesta (31/12).
Antes ne’e, Prezidente Repúblika, Francisco Guterres Lú Olo promulga ona Dekretu-Lei ne’ebé kria subsídiu ba profisionais ba sira-nia atividade jornalístika husu husi Governu ba fornesimentu notísias kona-ba virus SAR-Cov2 durante estadu emerjénsia.
Profisionais komunikasaun sosial iha papél importante tebes tanba liuhusi sira-nia atividade jornalistika durante estadu emerjénsia kontribui ativamente ba divulgasaun informasaun kredivel no nesesáriu ba prevensaun no kombate pandemia iha territóriu nasionál. Liuhusi atividade jornalístika profisionais komunikasaun sosial fó informasaun ne’ebé loloos hodi nune’e hatun ansiedade no prevene pániku iha populasaun nia leet no ikusmai kontribui hodi halo tuir regras estadu emerjénsia ninian.
Desinformasaun ne’ebé mosu iha redes sosiais atu halo ema la fiar autoridade relasiona vasinasaun no kombate ba moras ne’e, papél jornalista importante tebes halo populasaun informadu no fiar ba medidas implementasaun estadu emerjénsia nian.
Papel jornalista nian ne’ebé identifikadu no husu espesifikamente husi Governu tanba ne’e bele hetan rekompensa. Subsídiu ne’e fó ba jornalista sira haree ba rekoñesimentu risku ne’ebé profisionais orgaun komunikasaun sosial hasoru durante hala’o atividade jornalístika iha pandemia Covid-19 nia laran.s
Subsídiu ne’e sei fó ba jornalista sira ne’ebé dezenvolve atividade jornalístika ho Sala de Situasaun Sentru Integradu Jestaun Krize ou sira ne’ebé Governu husu ba produsaun notísia durante períodu entre 1 abril-31 dezembru 2021. Subsídiu sei sura loron traballu efetivu durante data ne’ebé temi iha leten. Jornalista sira ne’e sei simu osan ho valór $5 ba kada loron efetivu traballu nian.
Ministru Assuntu Parlamentares no Komunikasaun Sosial, ho baze informasaun fornese husi Sala Situasaun Sentru Integradu Jestaun Krize ou husi Diresaun Nasionál ba Diseminasaun Informasaun Ministériu Assuntus Parlamentares no Komunikasaun Sosial aprova lista profisionais ne’ebé dezenvolve atividade jornalístika priensi kondisaun hatur iha artigu 1 husi Dekretu-Lei ne’e ne’ebé hateten katak subsídiu ba profisionais hala’o atividade jornalístika, tuir Lei númeru 5/2014, 19 novembru, Lei Komunikasaun Sosial, hamutuk ho Sala Situasaun Sentru Integradu Jestaun Krize ou sira ne’ebé Governu husu ba produsaun notísias iha kondisoins direta ba espozisaun virus SARS-Cov2 durante implementasaun estadu emerjénsia deklara tutuirmalu husi dekretu Prezidente Repúblika.
Dekretu-Lei ne’e aprova iha Konsellu Ministru iha 11 novembru 2021.
