Apelu ne’e Primeiru-Ministru hato’o liu-hosi serimónia Natal hamutuk ne’ebé organiza hosi Ministériu Obras Públikas iha salaun OCA, Surikmas, sesta (20/12/2024).

“Momentu kmanek ida ne’e ita iha tema ida atu halo referelesaunn, atu kurize, atu hadi’a, tanba ita liu ona tinan ida ho balun, ita hadi’a dadaun ona buat ruma, hodi la’o ba oin no tinan oin tenke servisu diak liu tan,”PM apela liu husi komunikadu ne’ebé Online INDEPENDENTE asesu, domingo (22/12/24).

Xefe Governu ko’alia kona-bá buat barak ne’ebé MOP tenke halo hanesan estrada, bee no buat seluk tán.

Apelu ne’e fó-sai tanba foin lalais Xanana Gusmão ko’alia iha Ministériu Finansas, husu bá MOP, Ministériu Planeamentu no Investimentu Estratéjiku (MPIE) no Ministériu sira seluk, katak, bainhira la ezekuta orsamentu tinan ida-ne’e ho di’ak, entaun tinan seluk la gasta ona osan no lalika servisu ona.

Iha fatin hanesan, Ministru Obras Públikas, Samuel Marçal kontente no konsidera prezensa PM Xanana Gusmão nian lori espíritu no forsa boot bá Ministériu atu servisu di’ak-liu tán iha tinan foun.

Samuel Marçal subliña, MOP halo servisu ida ne’ebé hakbesik-an liu bá povu tanba iha kualkér tempu ema sempre telephone, bainhira ahi mate ema telephone, kanu bee kotu ema telephone, estrada kotu ema telephone, ne’e hatudu katak sira tau konfiansa bá Ministériu ida-ne’e no sira fiar katak úniku Ministériu ida-ne’e mak bele responde sira-nia nesesidade.

Maski iha dezafiu oioin ne’ebé funsionáriu sira MOP nian enfrenta iha terrenu, maibé ho Maromak Nia tulun no apoiu tomak hosi PM Xanana maka sei fiar katak, MOP sei forsa atu servisu di’ak liu tán iha tinan oin.

Nune’e, Samuel Marçal informa hela bá PM Xanana katak, ezekusaun orsamentu MOP nian bá tinan 2024, oras-ne’e daudaun atinje ona 85%.

Kapitál dezenvolvimentu atinje ona 75% no sei iha pagamanetu barak iha ADN, Ministériu Finansas no Samuel Marçal fiar katak to’o iha 30 Dezembru 2024 bele atinje 80%.

Iha infraestrutura nian, oras-ne’e daudaun atinje ona 71%, nia dehan, ne’e hatudu katak ema hotu-hotu iha MOP servisu makaas no servisu hamutuk inklui seitór privadu sira, no funsiornáriu sira tomak, la’ós de’it Ministru mak servisu mesak.

Iha tinan ida-ne’e, MOP nia proposta hotu-hotu ne’ebé aprezenta bá iha Komité Revizaun Orsamentu Polítika (KROP) ne’ebé lidrea hosi PM Xanana, aprova hotu. Samuel Marçal konsidera ida-ne‘e hatudu katak, Primeiru-Ministru sei iha konfiansa bá MOP atu kontinua halo servisu.

Tanba ne’e maka nia husu bá estrutura tomak MOP nian atu kontinua servisu hamutuk, servisu ho neon, servisu ho laran bá rai ida-ne‘e. Husu tenke banati tuir ezemplu Kay Rala Xanana Gusmão nian ne’ebé servisu bá rai ne’e hahú kedan tempu rezisténsia to‘o ohin loron kontinua servisu bá povu ida-ne‘e nia di‘ak.

Samuel Marçal observa katak, iha funsionáriu balun ne‘ebé la gosta Ministru iha ne‘e tanba iha mudansa ruma, maibé iha PM Xanana nia oin hakarak esklarese katak, hanesan Ministru laiha ódiu no vingansa pessoál.

Maibé, Samuel Marçal hateten katak, buat ne‘ebé mak muda bá rai ida-ne‘e nia di‘ak tenke muda duni.

Informa mós bá Xefe Governu katak, bainhira Samuel Marçal tama mai iha MOP haree de‘it maka diresaun hotu-hotu la servisu hamutuk.

BTL halo ninian, EDTL halo ninian, estrada halo ninian no nunka servisu hamutuk. Tanba ne’e maka bainhira diresaun ida halo tiha, diresaun seluk bá sobu fali hodi rezulta Estadu mak tenke lakon.

Hosi ida-ne’e maka Ministru ne’e hola inisiativa hodi konvoka reuniaun ida involve diresaun hotu-hotu, estabelese ekipa ida ne’ebé ho naran Brigada Intervenção Rapida (BIR).

Alende ne’e, bainhira Samuel Marçal tama halo vizita bá munsípiu sira, tékniku sira iha terrenu laiha fasilidade, enjeñeiru sira iha munisipiu laiha komputadór.

Tanba ne’e maka, iha tinan ida ne’e Ministru deside hodi hola motór hamutuk 40-resin hodi distribui bá sira ho objetivu atu bele halo monitorizasaun bá projetu sira iha munsípiu ho efisiénsia.

Misaun MOP nian la’ós atu simu de’it obra ne’ebé di’ak no kulaidade maibé mós atu halo formasaun ba seitór privadu sira nune’e iha tinan oin bele iha kompetisaun ho empreza internasionál sira.

Iha oportunidade ne’e mós Padre Venâncio da Costa Pereira, S.J. hato’o hela reflesaun kmanek bá funsionáriu tomak MOP nian hodi prepara-an iha isin no klamar simu prezensa Kosok Oan Jesus iha Natal 2024 no simu tinan foun 2025 nakonu ho esperansa.

Natal hamutuk ne’e partisipa hosi funsionáriu tomak MOP nian no mós seitór privadu sira.