Tuir Komunikadu ne'ebé Online INDEPENDENTE asesu iha pajina Prezidensia Republika haktuir,  Prezidente elojia estudante sira tanba sira-nia manifestasaun neʼebé pasífiku no justu, hodi hateten katak sira-nia ezijénsia atu hamoos pensaun vitalísia ba Membru Parlamentu sira refleta sentimentu jerál povu Timoroan nian. Xefe Estadu gaba sira-nia empeñamentu síviku nuʼudar forsa ida neʼebé pozitivu hodi hametin instituisaun demokrátika nasaun nian no garante fundu públiku sira uza ho responsabilidade.

 

Prezidente konfirma ninia intensaun atu promulga kedas Lei foun neʼe bainhira haruka ona ofisialmente husi Parlamentu Nasionál. Prezidente Ramos-Horta reafirma ninia opozisaun neʼebé kleur ona ba eskema pensaun vitalísia, neʼebé Prezidente kontra ona dezde 2007, hodi subliña injustisa sosiál bainhira fó benefísiu hanesan neʼe ba ofisiál sira ho saláriu boot, enkuantu funsiunáriu públiku esensiál sira hanesan profesór no traballadór sanitáriu sira simu deʼit saláriu kiʼik. Asaun desizivu ida-neʼe, Prezidente salienta, nuʼudar korresaun nesesária ida atu garante justisa no fó prioridade ba nasaun nia moris-diʼak koletivu duke priviléjiu individuál.

 

Prezidente Ramos-Horta konsidera mudansa lejislasaun ida-neʼe nuʼudar pasu krusiál ida hodi foka fila-fali orsamentu Estadu ba setór produtivu sira. Hanesan ho ezijénsia estudante sira-nian, Prezidente haforsa nesesidade krítika atu hasaʼe investimentu iha edukasaun no dezenvolvimentu rurál. 

 

Prezidente afirma ninia kompromisu atu superviziona orsamentu ida neʼebé responde ba nesesidade bázika populasaun nian, hamenus desigualdade, no promove dezenvolvimentu sustentável no ekitativu ba sidadaun Timoroan hotu.