Portavoz Sentru Integradu Jestaun Krize (SIJK) Dr. Sergio Lobo hatete, pasiente konfirmadu pozitivu iha fatin izolamentu Vera Cruz sira hotu-hotu halo ona teste recovery soup atu bele hatene virus ne’e nia dezenvolvimentu iha sira nia isin.

“Sira halo teste recovery soup ne’e na’in rua maka sei pozitivu nafatin, pasiente ida maka rezultadu negativu dala rua tutuir malu ona tanba ne’e konsidera rekuperadu ona,” dehan nia, iha konferensia imprensa, ohin iha CCD.

Nia informa, sira hotu-hotu halo ona teste recovery soup dala rua tutuir malu maibé pasiente na’in rua pozitivu nafatin, tanba ne’e sei hein halo teste ba faze daruak nian. Pasiente na’in 19 maka sei hein rezultadu ba teste recovery soup dahuluk nian.

Nia mós informa, pasiente provavel na’in haat (4) iha fatin izolamentu Vera Cruz rekuperadu hafoin hatudu rezultadu negativu dala rua tutuir malu.

Tanba ne’e, Dr. Sergio klarifika katak, na’in neen mak rekuperadu iha fatin izolamentu, kompostu husi pasiente positivu na’in rua (2) no na’in haat (4) provavel.

“Loloos ne’e sira (provavel na’in haat rekuperadu) bele fila ba uma ona maibé sei halo desinfetante ba sira nia sasan no fatin ne’ebé sira hela ba antes sira fila ba uma. Tanba ne’e agora dadaun pasiente sira ne’ebé maka rekuperadu ne’e hamutuk na’in neen (6) ona hamutuk ho pasiente ne’ebé rekuperadu uluk ne’e,”eis Ministru Saúde ne’e esplika.