Enkuantu, Postu Saúde lima ne’ebé laiha médiku mak hanesan, Postu Saúde Weberek ho Postu Saúde Ailora, ne’ebé lokaliza iha Posto Administrativu Alas, Postu Saúde Foholau lokaliza iha Postu Administrativu Turiskai, Postu Saúde Bubulau lokaliza iha Suku Tutuluru, Postu Administrativu Same no mós Postu Saúde Maerotutu lokaliza iha Suku Datina, Postu Administrativu Same-Vila.
“Iha munisipiu refere, iha Sentru Saúde internamentu ida, maternidade iha haat no Postu Saúde iha 23, maibé Postu Saúde lima mak dadaun ne’e laiha médiku,”dehan nia iha salaun Madre FMA, Komoro, segunda ne’e (13/12).
Nia hatutan, foin dadaun Ministeriu Saúde halo ona rekrutamentu internatu ba iha Munisipiu Manufahi, maibé barak liu iha saúde públiku.
“Ita hatene katak saúde públiku ne'e so ba halo promosaun maibé atu atende direitamente no fó asitensia ba pasiente ne'e so infermeiru, parteira no médiku,”tenik nia.
Tanba ne’e, Diretóra SSM Manufahi, husu ba Ministra Saúde, iha tinan oin mai bele halo tan rekrutamentu ba médiku sira atu nune’e bele koloka ba iha postu saúde sira.
Entretantu, iha Munisipiu Manufahi iha médiku na’in 32, enfermeiru na’in 28 no parteira iha na’in 26.
Asistente Editor: Saturnina da Costa
