Tuir Segundu Komandante PNTL, Munisipiu Dili, Superintendente Euclides Belo hatete, pontu entrada lima iha Dili mak hanesan, metinaru no rezerva ida iha Hera nune’e mós iha Tasi-Tolu, iha Manleu Kasnafar no mós iha Palasíu Nobre Lahane nia leten inklui mota Marabia.

“Iha metinaru ohin ita aplika serkasanitaria, la aturiza transporte sira tama mai iha Dili nune’e ita atoriza de’it mak transporte ne’ebé nesesariu husi parte leste nian tama mai iha Dili, no transporte husi Dili ne’ebé atu sai ba munisipiu seluk ne’e taka total, inklui transporte ba parte leste, oeste no rai klaran  nian,”dehan nia iha knar fatin, Kaikoli (9/3).

Bazeia ba desizaun Governu katak sei hala’o serka sanitária ka konfinamentu obrigatóriu iha Munisípiu Dili, durante loron hitu, hahú oras 00:00 loron 9 fulan-marsu to’o oras 23:59 loron 15 fulan-marsu, ho posibilidade atu extende tan liu loron hitu.

Tanba ne’e, tuir Komandante Belo katak, ema ne’ebé bele tama-sai iha pontu entrada sira mak hanesan, Ajente Seguransa, Defeza, Mediku no ba kompaña sira ne’ebé fornesa aihan ba seguransa sira, no mós diresaun sira ne’ebé hetan autorizasaun formal husi Ministériu Interior (MI).

“Ida ne’e mak ita autoriza sira bele sai ba servisu no fila fali mai, ezemplu, dadauk ne’e mediku balun hela iha munisipiu Dili no ba servisu iha likisa no sira iha ona lista, ne’ebé diresaun mediku nia hato’o ona mai iha komandu atu bele fasilita. Nune’e dader sira ba servisu depois lokraik bele fila fali mai, ne’e maki ta fasilita,”nia informa.

Nia husu ba sira ne’ebé atu ba vizita familia no  halo lia no halo atividade sira ne’ebé la nesesariu labele sai husi uma no hakmatek iha fatin.

Enkuantu sidadun barak mak kumpre ona regra sira ne’e no espera katak sidadaun sira iha Dili mós bele kumpri regra ne’e.

Entretantu Sala Situasaun Sentru Intregadu Jestaun (SIJK) mós kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:

1. a) Uza máskara
2. b) Fase liman bebeik ho sabaun ka dezinfetante ruma
3. c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
4. d) Evita halibur malu barak
5. e) Hamri’ik ka tur dook husi ema seluk, mínimu metru ida ho balu.