Iha tinan kotuk Parlamentu Nasionál sosa ona karreta hamutuk 35 ho presu USD $ 41.000 kada karreta ka hamutuk millaun USD $1.435.000.
Nune’e, iha tinan ne’e Parlamentu Nasionál hasai tan osan hamutuk USD $1.230.000 hodi sosa tan karreta foun 30. Nune’e, soma hamutuk Parlamentu Nasionál gastu ona osan hamutuk millaun USD $2.665.000 hodi sosa karreta luxu.
Vise Prezidente Parlamentu Nasionál, Luis Roberto hatete, tinan kotuk PN sosa ona karreta Pajero Sport 35 ba deputadu sira, maibé iha tinan ne’e OJE 2020 PN sei prevé tan osan atu kompleta hodi sosa tan 30 ba deputadu sira.
“Tinan ida ita planu OJE 2020 prevé para sosa tan hodi distribui ba deputadu sira ne’ebé sei uza karreta tuan”, dehan nia, iha Uma Fukun PN, horisehik (13/1).
Antes ne’e, sosiedade sivíl kestiona makaas polítika Parlamentu Nasionál hodi prevaleze aan ho karreta foun, tanba kondisaun povu nian barak sei moris kiak no mukit.
Diretór Forum Organizasaun Naun Governamentál Timor-Leste (FONGTIL), Daniel Marçal, antes ne’e dehan ba deputadu sira katak dignidade deputadu nian la’ós ho karreta foun tanba dignidade la sukat ho materiál.
Tuir nia, deputadu sira sei laiha dignidade bainhira povu kontinua moris iha situasaun mukit, maibé sira goza priviléjiu ho karreta foun.
Polítika sosa karreta foun hamosu protesta oioin husi sosiedade no akadémiku sira, maibé deputadu sira la importa no mantein nafatin sosa karreta foun tanba konsidera importante tebes ba deputadu sira hodi hala'o sira ninia knaar.
