Deputada Bankada CNRT, Maria Barreto hateten, programa governu nian hamosu rekejitu bainhira idozu no Ema ho Defisiénsia (EhD) atu simu sira-nia subsídiu, tenke iha Bilete Identidade.
"Entaun realidade ne'ebé akontese kuaze munisípiu hotu, idozus no Ema ho Defisiénsia, inan isin rua ne'ebé atu hetan bolsu jerasaun foun, tenke ba antrian iha notariadu," dehan nia, iha Parlamentu Nasionál, horisehik.
Nia hateten, Governu halo programa ne'e ezije benefisiariu sira atu hetan, maibé la kria kondisaun entaun akontese katak idozu no Ema ho Defisiénsia no mós inan isin rua ba dudu malu iha notariadu ne'ebá lori oras ba oras atu hetan BI sai rekejitu atu hetan pagamentu husi governu.
"Ba ha'u-nia kestaun mak governu aumenta rekejitu hanesan ne'e presiza hanoin hodi kria kondisaun ne'ebé di'ak ba idozu no Ema ho Defisiénsia atu sira ho kondisaun ne'ebé konfortavel, atu sira asesu ba fatin administrasaun públiku liuliu notariadu munisipál sira ne'e," tenik Maria.
Iha fatin hanesan, deputadu bankada Fretilin, Dario Madeira hateten, emisaun ba sertidaun RDTL ho Bilete Identidade (BI) implika ba direitu pagamentu idozus sira.
"Ida-ne'e liga ho idozu sira tanba iha ema barak tinan tama ona idozu nian atu simu osan, maibé tanba sira laiha sertidaun RDTL ho BI, agora difikulta hela sira atu labele simu nia direitu ne'e, até sira-nia naran mós xefe suku no xefe aldeia aprezenta laiha nafatin lista benefisiariu," nia hateten.
Nia rekomenda ba governu karik bele emisaun ba sertidaun RDTL ho Bilete Identidade ba to'o iha postu administrativu sira. Atu suku no aldeia mai asesu iha nivel ne’e de'it, bainhira sira hakarak halo sertidaun RDTL ho Bilete Identidade.
"Tanba kondisaun estrada iha territóriu tomak ne'e la permite inan-aman sira ne'ebé idade avansadu ona ho defisiénsia sira atu transforma to'o iha munisípiu ne'e difisil tebes," nia fundamenta
Nia hatutan, tanba ne'e di'ak liu governu ba besik sira atu sira bele asesu sertidaun RDTL ho Bilete Identidade ne'e.
"Parese BI ne'e seidauk sai preokupasaun tanba ne'e ba tinan oin simu fali mak foin presiza, maibé ida agora mak sertidaun RDTL sira asesu difisil. La'ós idozu de'it, maibé estudante de'it mós asesu sertidaun RDTL difisil," dehan Maria.
Nia akresenta, tanba ne'e presiza governu nia prezensa iha nível postu nian atu falisita liu komunidade atu bele hetan sertidaun RDTL ho BI.
Deputada Bankada Fretilin, Maria Angelica Rangel hateten, Parlamentu Nasionál depois aumentu osan Idozu sira.
"Maibé to'o agora foin primeiru ministru ho vise-primeira ministra ba lansa ona iha Likisa, hau hakarak husu ba governu atu aselera ezekusaun," dehan nia.
Nia hateten, tanba ohin kestaun deputadu sira katak atu foti osan presiza sertidaun RDTL, kartaun eleitoral no BI sira hotu, entaun ida-ne'e halo prosesu kleur.
Maibé atu dehan prosesu ne'e la'ós atu selu foun, maibé prosesu ne'e atu atualiza de'it montante orsamentu ne'ebé konkorda atu hasa'e ba idozu sira.
Nia fundamenta, banku nia devér mak atu selu de'it desde governu haruka dadus kompletu, maibé governu seidauk fó dadus banku seidauk selu, tanba atu selu depende governu haruka lista benefisiariu sira ba banku.
Hataan ba ne'e, Sekretáriu Estadu ba Komunikasaun Sosiál (SEKomS), Merício Juvinal dos Reis “Akara” hateten, rejistu preokupasaun deputadu sira nian no sei informa ba ministériu kompetente atu bele toma atensaun.
