PN autoriza pedidu Prezidente Repúblika liu husi projetu rezolusaun 106/V(4a) refere dezlokasaun Prezidente Repúblika ba Reinu Kambodia no projetu rezolusaun númeru 107/V(4a) dezlokasaun ba Konfederasaun Suisa ho Repúblika Portugál.
Parlamentu Nasionál aprova projetu rezolusaun 106/V (4a) a-favór 47 no projetu rezolusaun númeru 107/V (4a) a-favór 48.
Prezidente Parlamentu Nasionál, Aniceto Longuinhos Guterres Lopes hateten, Parlamentu Nasionál fó ona konsentimentu ba Prezidente Repúblika ba vizita rai li'ur.
"Nune'e Parlamentu Nasionál fó ona konsentimentu ba viajen Prezidente Repúblika ninian ba Reinu Kamboja, Zenebra-Suisa ho Portugál," nia hateten iha Parlamentu Nasionál, Tersa (11/10/2022).
Ho koñesimentu Parlamentu Nasionál, planu Prezidente Repúblika vizita Estadu ba Reinu Kambodia iha loron 16-23 Outubru 2022, ba Zenebra-Suisa vizita servisu iha 28-29 Outubru 2022 no vizita Estadu ba Portugál ne’e hetan konvite husi Prezidente Repúblika Portugál, Marcelo Rebelo de Sousa, ne’ebé sei hala’o iha 30 Outubru no 01 Novembru tinan ne’e. Iha Lisboa, PR Horta sei partisipa mós Web-Sumit 2022 iha 04 novembru ne’ebé konvida husi organizasaun.
Pedidu Prezidente Repúblika husu konsentimentu ba Parlamentu Nasionál bazeia númeru 1 artigu 80, no alínea h) númeru 3 artigu 95 Konstituisaun Repúblika Demokrátika Timor-Leste (K-RDTL).
Husu Parlamentu Nasionál nia autorizasaun ba vizita Estadu ba Kambodia, Suisa no Portugál.
