Prezidente Parlamentu Nasionál Deputadu, Aniceto Longuinhos Guterres Lopes anunsia votasaun ba renovasaun estadu emerjénsia a-favór 55, kontra 0 no abstensaun 0.

“Nune’e projetu lei kona-ba autorizasaun ba renovasaun deklarasaun Estadu Emerjénsia passa,”Prezidente Parlamentu Nasionál Deputadu Aniceto anunsia liuhusi plenária, Sabado (03/10).

Prezidente Bankada CNRT, Duarte Nunes hateten, realmente ba situsaun virus covid-19 halo Timor-Leste hasoru preokupante, maibé Estadu Emerjénsia ba da-lima ka da-neen nian ona.

“Ita iha nesesidades atu autoriza estadu emerjénsia, mais iha fulan hirak liu-ba hanoin ona atu troka situasaun estadu emerjénsia ne’e ho lei seluk ne’ebé la presija mai bebeik iha Parlamentu Nasionál hodi aprova, tanba ne’e ha’u husu informasaun leis sira-ne’ebé Prezidente Repúblika to’o ona ne’ebé,”nia dehan.

Vise-Prezidente Parlamentu Nasionál, Luis Roberto da Silva hateten, moras virus covid-19 hanesan moras ida-ne’ebé ladiak, tanba ne’e presija estende estadu emerjénsia.

“Tanba ne’e mak ita la presija ko’alia barak no Parlamentu Nasionál tenke prontu atu fó autorizasaun hodi fó nafatin ba governu para kria kondinsaun hodi bele kompate virus covid-19 iha rai laran,”dehan nia.

Vise-Prezidente Bankada FRETILIN, Antoninho Bianco agradese ba governu mesmu iha difikuldades barak, halo netik buat ruma hodi trava moras covid-19 tama mai Timor-Leste.

Parlamentu Nasionál fó-sai katak, governu hikas fali atu halo renovasaun ba Estadu Emerjénsia ho medida ne’ebé hanesan.

Prezidente Repúblika husu pedidu autorizasaun ba Parlamentu nasionál bazeia ba alínea g konjuga ho artigu 85 no konjuga artigu 25 iha Konstituisaun RDTL no artigu númeru 1,9, 10, 11, 15 no 27 husi Lei númeru 3/2008, 22 fevereiru kona-ba Rejime Estadu de Sítiu no Estadu Emerjénsia, ho objetivu renova deklasaun Estadu Emerjénsia iha territóriu nasionál tomak, ho razaun iha subsisténsia situasaun kalamidade públika ba periodu loron tolu nolu (30). Pedidu Prezidente Repúblika nian  husu renovasaun ho ninia durasaun loron Tolu Nolu (30) hahú husi 00 oras iha 5 outubru  2020 (Segunda-Feira) termina iha 23.59 oras iha loron 3 novembru 2020 (Tersa-Feira) iha territoriu nasionál tomak hodi suspende direitu balun ho parsialmente tuir mai ne’e:

1. Sirkulasaun internasionál, sei estabele kontrolu sanitáriu iha Portu, Aeroportu ka Postu Fronteira Terrestre, atu impede moras ne’e tama mai territoriu nasionál ka kondisiona observansia kondisaun nesesáriu hodi evita risku propagasaun epidemia, nune’e mós toma medida nessisária asegura sirkulasaun internasionál ba bens no serbisu esensiál sira.
2. Liberdade sirkulasaun, no fixasaun rezidénsia ba kualkér pontu iha territóriu nasionál sei lidera husi autoridade públika sira hodi bele redús risku kontájiu no ezekuta medida prevensaun no kombate epidemia, inklui konfinamentu kompulsivu domisíliu.
3. Direitu rezisténsia, kualkér atu (ato) rezisténsia ativa ka pasiva emanda husi autoridade públika kompetentes kona-ba ezekusaun Estadu Emerjénsia.

Razaun Prezidente-Repúblika, Francisco Guterres Lú Olo husu revonasaun deklarasaun Estadu Emerjénsia, tanba Timor-Leste geografikamente besik Repúblika Indonézia ne’ebé rejista ona ema nain 278.000 kazu kofirmadu ba infeksaun COVID-19, ema na’in-10.000 mak mate, husi provinsia 34 iha territóriu Indonézia nian inklui provínsia viziña Timor Osidentál (Nusa Tenggara Timur-NTT).Nune’e mós nasaun viziña Austrália ne’ebé rejista ona rihun 27-mill kazus konfirmadu covid-19 no ema nain-800 mak mate ona.