Nia informa ba Prezidente Repúblika tanba ultimavez hasoru Prezidente Repúblika propoin atu simeira CPLP iha tinan ne'e halo iha Lisboa.

"Ministru Negósiu Estranjeiru no Kooperasaun, Bendito Freitas dehan sei diskute iha Lisboa, mas sei la halo. Iha tinan 30 ne'e ida-idak halo iha nia-rain, ne'eduni sei la halo iha Lisboa," dehan PM Xanana, iha Palásiu Prezidensiál, Bairru-Pité, horisehik.

Maibé, tanba Timor-Leste mós kaer Prezidensia CPLP ne'e hanesan buat ida la hala'o servisu ruma loloos ne'e, Timor-Leste só simu ba iha 2027.

"Ne'e 2027 mak ita sei haree, oinsá simeira CPLP ninian ne'e iha ne'ebé Prezidensia CPLP ne'e iha ita-nia liman duni, agora ne'e hanesan ita kaer hela de'it," PM Xanana konklui.

Antes ne'e, Prezidente Repúblika, José Ramos Horta, propoin ba Governu atu realiza selebrasaun tinan 30 ezisténsia komunidade nasaun sira ko'alia lian Portugés (CPLP) iha Lisboa-Portugál.

"Primeiru Ministru, ami ko'alia hela kona-ba ita atu organiza atividade sira CPLP nian. Ita mak agora hanesan Prezidensia, atividade sira Governu mak deside, ba tinan 30 ezisténsia CPLP di'ak liu halo iha Portugál. Ho razaun katak, tinan primeiru hamoris organizasaun ne'e iha Portugál. Ho nune'e, eziténsia CPLP ba tinan 30, ita selebra iha Portugál," dehan PR Horta.