Enkuantu, Primeiru Ministru akompaña husi nia Espoza Isabel da Costa Ferreira no mós oan na’in rua hamutuk ho Xefe Gabinete Primeiru Ministru nian.
Xefe Governu ne’e konsidera Saudozu Max importante ba nasaun ida ne’e nia ukun rasik an.
“Nasaun tomak, povu tomak, Estadu Timor fó omenajen ida ne'e, tanba nia papél ne'ebé nia dezempeña durante ita-nia luta, espesialmente ba iha kazu 12 de Novembru joven sira nia luta,” dehan nia ba jornalista sira hafoin Presta Omenajen ba Saudozu Max Sthal, iha CAMSTL, Benfika, kuarta horseik (15/12).
Xefe Governo afirma, papel Saudozu Max Sthall nian no media sira importante iha luta ba libertasaun nasionál, hodi fanun mundu tomak no sensibiliza mundu kona ba sofrimentu Timoroan sira nian, espesiál iha Masakre Santa Cruz 12 Novembru 1991.
"Se média la iha, ema ignora ita, ema la koñese ita, ema la hatene ita i papél média nian no papél Max Stahl nian fundamental loos fanun ema hotu, fanun mundu tomak, sensibiliza sira hotu katak buat ne'ebé sira hatene la hanesan la'o iha rai laran,”tenik nia.
Enkuantu, Saudozu Max mak halo filmajem kona ba brutalidade Forsa Indonézia nian iha akontesimentu masakre Santa Cruz, 12 Novembru 1991, ba nia dedikasaun refere.
Nune'e, Estadu Timor-Leste konsidera Max Sthall hanesan erói nasionál ida, hodi atribui Grau Kolar Ordem de Timor-Leste ho titulo póstumo, nu'udar jestu agradesimentu Estadu ba Saudozu nia kontribuisaun iha luta ba libertasaun nasionál.
Saudozu Max Stahl nudar ema Britániku, moris iha loron 06 fulan-dezembru tinan 1954, no husik mundu iha loron 28 fulan-Outubru tinan 2021 iha Ospitál Brisbane, Austrália, tanba sofre moras.
Enkuantu, Saudozu Max Sthal nia Ahu Kdesan to'o iha Aeroportu Internasional Nikolau Lobatu iha kuart (15/12), iha tuku 11:38, akompana husi Saudozu nia Espoza Indric Bucens ho nia oan no familia balun.
Hafoin to'o iha Aeroportu internasional Nikolau Lobatu Saudozu Max Sthall nia Ahu Kdesan, familia entrega direita ba Lider Karismatiku Kay Rala Xanana Gusmão no Laureadu Nobel da Páz, José Ramos Horta hafoin entrega fali ba Governu.
Entretantu, Saudozu Max Sthall nia Ahu Kdesan agora dadauk rai iha CAMSTL, hafoin sei haloot iha loron 17 Dezembru 2021, iha semiteriu Santa Cruz, Balide Dili.
Asistente Editor: Saturnina da Costa
