Virgílio dehan, bazeia ba fiskalizasaun ne’ebé PDHJ halo, problema sira iha setór saúde hahú husi falta stock ai-moruk, limitasaun fatin ba pasiente sira, no problema jestaun rekursus umanus.
Nia esplika katak iha mós kazu sira ne’ebé ema profesional sira hasai husisistema, no depois rekrutamentu foun tau ema sira ne’ebé la tuir kapasidade téknika ba posizaun importante sira.
Tanba situasaun ne’e, PDHJ haruka ona rekomendasaun ba Parlamentu Nasionál atu halo inkeritu ba problema sira ne’e, tanba instituisaun ne’e iha autoridade atu halo investigasaun no husu responsabilidade husiGovernu.
“Ita halo fiskalizasaun ba entidades públikas no husu sira nia kooperasaun, maibé se sira la halo tuir, entaun ami rekomenda ba Parlamentu Nasionál. Ami la bele dehan buat ida de’it, tanba sira rasik rekoñese katak setór saúde iha problema. Problema nia hun maka iha jestaun rekursus umanus, jestaun programa no koordenasaun,” dehan Provedor Virgílio iha Otél Timor, Kuarta (11/03).
Tuir nia, problema ne’e liu-liu identifika iha Hospital Nasionál Guido Valadares (HNGV).Nia hatete katak bainhira ekipa PDHJ vizita ospitál iha fatin seluk, jeralmente jestaun la’o di’ak, maibé difikuldade sira barak mosu iha HNGV.
Provedor rekomenda ba Governu liuhusi Ministra Saúde no responsável sira iha ospitál atu tau atensaun boot liu ba jestaun rekursus umanus, liu-liu iha prosesu identifikasaun no utilizasaun profesional médiku sira.
Liga ho atividade Ministra Saúde, Élia dos Reis Amaral, ne’ebé daudauk ne’e akompaña Primeiru Ministru Kay Rala Xanana Gusmão iha vizita ba munisípiu sira, PDHJ dehan katak sira la intervén iha programa Governu nian. Maibé, nia enkoraja katak membru Governu sira bainhira halo deslokasaun, tenke asegura servisu iha ministériu la para.
Tuir PDHJ, se ministru ka lideransa sai husieskritóriu, tenke iha delegasaun kompeténsia ba ema seluk atu kontinua jere servisu no garante atendimentu públiku la bele para.
Aleinde ne’e, PDHJ mos fó komentáriu kona-ba informasaun katak Ministra Saúde bandu sentru saúde sira atu la fó sai dadus kona-ba moras dengue ba públiku. Ba kestaun ida ne’e, PDHJ afirma katak ospitál hanesan fasilidade públika, nune’e povu iha direitu atu hatene informasaun kona-ba situasaun saúde públika.
“Provedor la konkorda ho desizaun atu la fó informasaun ba jornalista sira iha ospitál. Periodikamente, ospitál tenke fó informasaun ba públiku. Sira presiza iha portavóz atu esplika kona-ba situasaun hanesan moras, stock ai-moruk ka problema fatin,” dehan nia.
Provedor mos subliña katak jornalista sira tenke iha asesu atu husu informasaun iha ospitál, no la di’ak se autoridade sira bandu media asesu maibé mos la fó informasaun ba públiku.
