Kordenadór Forsa Tarefa ba Prevensaun no Mitigasaun Surtu Covid -19 iha Timor-Leste, Rui Maria de Araujo informa katak, progresu atividade prevensaun no mitigasaun surtu Covid -19 iha municipio Dili, hafoin deteta kazu foun rua iha bairo BTN II Tasi-Tolu, Ekipa Konjunta Saúde buka tuir kontaktu besik hahú horseik loron 10 to’o 11 fulan-Marsu deteta tan kazu positivu 14.
“Husi numeru kazu 14 ne’e, na’in 12 husi munisipiu Dili no na’in rua husi munisipiu Covalima, enkuantu kazu pasiente Covid-19 ba loron ohin aumenta ba 65,” dehan nia iha Konferensia Imprensa, CCD (11/3)
Rui esplika, numeru kazu positivu 12 ne’ebé husi munisipiu Dili, na’in ida kontaktu besik kazu positivu Bebeonuk, na’in 8 kontatu besik funsionariu SEFOPE ne’ebé ralata ona iha loron rua liu ba, kazu positivu rua husi Ministeriu Finansas(MF) ho Ministeriu Transporte Komunikasaun (MTK) no positivu ida husi iha aldeia 4 setembru Tasi-Tolu ne’e husi rezultadu restreiu aliatoriu.
Ho nune’e kazu positivu iha dili hamutuk 36 fahe ba Cluster hanesan, klaster BTN 2 Tera Santa iha kazu 6, Golgota iha kazu 3, Lurumata iha kazu 2, Comoro kazu 1, Fomentu kazu 3, Fatuhada 05 iha kazu 3, Bebonuk kazu 2, Delta kazu 1, MF kazu 3, SEFOPE kazu 9 ,MTK iha kazu 2 no HNGV iha kazu 1. 36 kazu iha Cluster 12, instituisaun 4 no suku 4 iha Postu Administrativu Dom Aleixo. 
Tanba ne’e, Dr. Rui salienta katak husi kazu foun 14 kompostu husi munisipiu Dili hamutuk 12 no munisipiu Covalima na’in 2, kazu rekoperadu 0, no kazu ativu 65.Total pasiente 65 ne’ebé baixa hela iha sala izolamentu Vera Cruz Dili.
Entretantu, Governu mós deside hapara ona serka sanitaria iha Munisipiu Covalima. Enkuantu iha Postu Administrativu Fatumea sei kontinua aplika medida serka sanitária.
SIJK kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
a) Uza máskara
b) Fase liman bebeik ho sabaun ka dezinfetante ruma
c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
d) Evita halibur malu barak
e) Hamri’ik ka tur dook husi ema seluk, mínimu metru ida ho balu