Tuir pasajeiru Nidio Abilo Fernandes Sarmento, hatete, antes sai husi ne'e problema uitoan maibé ajensia dehan buat-hotu iha sistema ona ba de'it, bainhira to'o halo check-in bord la aseita atu tama tanba Bord tiket laiha.

"Sira la haruka ami tama tanba pandemia Covid-19 mós hanesan ne'e no situasaun la favoravel, maibé sala ne'e konpaiña mak vistu tiketi la loos,"dehan nia iha edifisiu Ajensia Naspov, Fatuhada, Dili, segunda ohin (26/04).

Nia hatutan, tuir lolos ne'e la’o di’ak maibé failla iha ajensia vistu tiket ne'e, husi Dili ba Inglaterra depende tuun iha Manchester ga iha ne'ebe.

"Ami tenta halo mensagen no telefone ba ajensia ne'e mais la simu telfone no la resposta ba mensagen sira ne'e no komentariu ba ami nia pergunta ne'ebe ami hato'o ba sira katak iha ne'eba husu de'it ami ho pasporte Timor fila tanba iha ne'eba check hotu ami nia dokumentu,"nia esplika.

Tanba ne’e nia ba Ajensia Narpov atu fó fila sira nia osan. Osan ne'ebé entrega ba ajensia ne'e balun dolar amerika $2,000, $3,000 to’o $10,000.

“Ami hakarak fó fila ami nia osan kompletu se kompaña ajensia Narpov la fó, ami levanta kazu ba oin no husu ajensia ne'e tenki taka tanba laiha kualidade depois ilegal no sujere di’ak liu taka duke ema seluk sai  vitima tan,”tenik nia.

Aliende husi pasajeirus na’in ida seluk hatete katak, iha dokumentu teste PCR ne’e deskonfia falsifika tanba mesin la deteta. Dokumentus ne’e scan de’it, no karimbu ne’e la vale.

Entretantu, Diretór kompaña Ajensia Narpov unipesoal LDA, José Alexandre Zeca Guterres responde katak, nia prontu atu fó fali pasajeiru sira nia osan maibé ho kondisaun.

Ajensia sei halo verifikasaun ba problema lolos ne’ebé impede pasajeiru na’in 35 la konsege kontinua sira nia viajen.

Nune’e Ajensia Narpov promote ba pasajeirus sira katak iha semana rua nia laran atu rezolve asuntu ne’e.

“Sira la ba tanba saida, ami presiza justifikasaun husi Aeroportu Dili no Malazia no ami tenki halo konfirmasaun ho ida ne’e, no ida ne’e laos prosesu ne’ebé lalais maibé sei presiza tempu hodi buka mós referensia ba dadus balun hodi resolve problema ne’e,”nia informa.

Molok ne’e iha pasajeirus na’in 53 halo viajen atu ba Inglatera no balun ba Portugal, sira sai husi Dili iha loron 18 fulan-abril.

Nune’e to’o iha Malazia sira la konsege kontinua sira nia viajen tanba sira nia tiket ne’e to’o iha Malazia de’it.  

Entre pasazeiru na’in 53 ne’e iha na’in 18 mak iha pasaporte Portugal no na’in 35 ho de’it pasaporte Timor-Leste.
Nune’e pasazeiru na’in 18 kontinua hala’o sira nia viajen ho aviaun Europa nian ba Lisboa Portugal.

Sira na’in 35 fila mai Timor-Leste iha loron 24 fulan-abril loron hirak liu ba.

Jornalista: Saturnina da Costa

Editor: Jose Sarito Amaral