Nune’e, iha sexta-feira, semana kotuk, Prezidénsia republika hamutuk Ministériu Juventude, Desportu, Arte no Kultura hahú ona lansamentu rejista ba atleta sira-ne’ebé hakarak partisipa atividade Dili Internasional Marathon 2025.
Ministru Juventude Desportu Arte no Kultura, Nelyo Isaac Sarmento hatete, ohin Prezidente Repúblika ho Governu liu husi Ministériu Juventude Desportu Arte no Kultura, hakarak uza oportunidade atu fó hatene ba públiku ohin halo lansamentu ba atividade ne'ebé atu halo iha outubru, bolu Dili Internasional Marathon.
Nia dehan, Dili Internasional Marathon ne'e inisitiva ida husi Prezidente Repúblika, servisu hamutuk ho Governu liu husi MJDAK, ne'ebé mai ho hanoin rua, hanoin dahuluk tanba Timor-Leste iha prosesu integra ba membru ASEAN, entaun uza Dili Internasional Marathon hanesan mós espasu ida atu ba iha ne'ebá.
“Ita mós hatene katak, husi mundu hotu-hotu triste, tanba konflitu iha rai bara-barak mak Dili Internasional Marathon ne'e ita bolu dehan, ita halai ba palestina. Ne'e hanesan meius solidaridade povu Timor ba sofrimentu ne'ebé povu Palestina infrenta oras ne'e daudaun,” Dehan Ministru Nelyo, liu husi Konferénsia Imprensa, ambitu Lansamentu Dili International Marathon 2025 “Run for Palestine”, iha Salaun Xina, Palásiu Prezidensiál Bairu-Pite, Sesta (01/08).
Nia hatete, purtantu ida ne'e hakarak hato'o mensajen ba mundu katak, nafatin promove diálogu, nune'e hakiak nafatin áaz no dame iha mundu.
“Entaun, eventu Dili Internasional Marathon ne'e iha misaun ba ida ne'e. Komesa husi lansamentu ohin nian, liu husi Federasaun Atletismu, nune'e mós Prezidente Repúblika, hahú halo rejistrasaun ba atleta sira ne'ebé hakarak partisipa iha eventu ne'e,” Nia informa.
Nia informa, iha objetivu prinsipál ida mós atu uza meius ne'e ba tama ba membru ASEAN mak konvidadu atleta sira-ne'ebé sei partisipa iha eventu ne'e mak atleta sira husi país membru ASEAN de'it mak sei hetan oportunidade mai Timor-Leste partisipa Dili Internasional Marathon 2025.
Nune'e mós loke nivél internasionál uitoan, maibé ba komunidade estranjeiru ne'ebé hela iha Dili, sira hakarak hotu-hotu partisipa, bele partisipa.
Tanba, Dili Internasional Marathon iha númeru haat, ne'ebé atu uza ba kompeténsia ida Marathon nivél internasionál, meia Marathon ne'ebé 21 killo-metru, nune'e mós 10 killo-metru ba Ema ho Defisiensia no mós jerál.
Mekanismu rejistu, nia afirma, bele rejista liu husi online no bele rejista iha Federasaun Atletismu, nune'e to'o loron ikus bele dehan data ba kompetisaun ne'e 11 Outubru 2025.
Nia haktuir, halai taru sei hahú oras tuku 06:00 dadersan, ne'ebé atleta sira ne'ebé hakarak partisipa bele prepara aan sedu, nune'e partisipa.
Tanba ne'e, husu ba komunidade sira ne'ebé hela iha Dili, rute ne'ebé atleta sira sei halai liu atu ema hotu-hotu, fó suporta, apoiu nune'e atleta sira bele halai kondisaun ne'ebé di'ak to'o termina kompetisaun iha oras 08:00 ka 10:00, tanba hahú husi Palásiu Prezidensiál, entaun sei remata iha Palásiu Prezidensiál.
Iha fatin hanesan, Xefe Kaza Sivil Prezidénsia Repúblika, Jezuina Maria Ferreira informa, Prezidente Repúblika mak sai patronu ba iha Dili Internasional Marathon, no eventu ne'e anula Prezidensia Repúblika. Tanba ne'e Prezidensia Repúblika prevee orsamentu kada tinan Dili Internasional Marathon.
Nia haktuir, ba tinan 2025 Prezidensia Repúblika prevee $100 mill dolares Amérikanu. Husi enkontru hamutuk entre Sekretariadu, Prezidensia Repúblika, Federasaun Atletismu halo proposta orsamentu ne'ebé aprejenta ba Prezidente Repúblika proposta ne'e ho montante $170.290 dolares Amérikanu.
Nia afirma, husi $70 mill itall ne'e kontribui husi MJDAK no mós husi Vise Primeiru Ministru Asuntu Ekonómiku.
"Ita mós sei hasai konvite nune'e buka sponsor ba eventu Dili Internasional Marathon ne'e. Ba manan na'in sira, sira sei simu prémiu montante osan no mós ho medalla ida ne'e mak ita sei fó ba manan sira tuir ida-idak nia kategória, ba labarik kiik oan sira ne'ebé kontribui halo rame Dili Internasional Marathon ne'e ita sei fó prémiu ba labarik sira tuir nesésidade labarik sira nian duni,” Haktuir nia.
Nia hatutan, kona-ba prémiu montante orsamentu husi $2 mill to'o 8 mill, ba internasionál sira hetan primeiru lugar, segundu to'o terseiru maibé kategória Timor husi primeiru to'o desimu lugar ne'e husi $8 mill to'o $200 dollar.
Nune'e mós mensajen Prezidente Repúblika, José Ramos Horta liu husi video hatete, ho laran haksolok mak nia konvida ema hotu-hotu ba Dili Internasional Marathon 2025 ne'ebé sei hala'o iha loron 11 fulan Outubru.
Nia dehan, eventu tinan ida ne'e lori mensajen importante mak halai ba Palestina, apelu ida ba pás no solidaridade globál.
“Iha tempu hanesan ne'e, ita selebra pasu istóriku ida, Timor-Leste nia adezaun ba ASEAN. Hamutuk mai ita halai ba unidade, ba reziliensia, ba esperansa,” Dehan PR Horta.
Nia esplika, halai ne'e sei hahú, no remata iha Palásiu Prezidensiál Nicolau Lobato, iha ne'eba atleta rihun ba rihun sei halibur iha dadersan nakukun, karik partisipa Marathon kompletu, meia Marathon, halai ba altera sira ka halai ba pás, nia pasu sira sei hatudu servisu kompromisu hamutuk ba futuru ida ne'ebé di'ak liu.
Nune'e, ba viziñu sira ASEAN, ami hato'o konvite espesiál ida, odamatan nakloke, no konvite sei to'o iha tempu badak, imi nia Federasaun Atletismu, mai halai hamutuk ho Timor, iha espiritu amizade no solidaridade ba atleta nasionál sira.
“Ha'u halo votus susesu ba imi nia preparasaun, orgullu no hein katak Ita nia preparasaun sai inspirasaun ba ita nia povu no nasaun. Ba povu tomak Timor-Leste, mai ita hakonu dalan sira ho haksolok, mai ita halai, la'ós de'it ba liña finál, maibé pás ba ASEAN, ba unidade. Mai ita hamutuk iha fulan Outubru DILI Internasional Marathon 2025, halai ba pás no solidaridade halai ba palestina,” Tenik nia.
