Informasaun ne’e konfirma liu husi komunikadu imprensa Prezidensia Repúblika, ne’ebé INDEPENDENTE asesu, Sesta (21/11).
Tuir komunikadu ne’e, Sofia, nu’udar inan ida ne’ebé serbisu maka’as, la hatene kole hodi fa’an modo no dose atu suporta nia oan na’in ualu nia edukasaun.
PR Horta hili nia nu’udar konvidadu espesiál Prezidente nian ba audiénsia refere nu’udar forma apresiasaun ba ninia luta lorloron, ne’ebé maske moris ho difikuldade, maibé nunka rende.
“Nia istória sakrifísiu no reziliénsia nian sai nu’udar símbolu ba forsa nonook ne’ebé sai nu’udar tulan-ruin ba nasaun Timoroan.”
“Konvite ida ne’e nu’udar testemuña boot ida ba kompromisu Prezidente Repúblika nian hodi fó onra ba nia eroi loro-loron nian,” komunikadu ne’e deklara.
Entretantu, ba Sofia, onra ida ne’e nu’udar mehi ida ne’ebé sai realidade, ne’ebé nia haree hanesan ahi-oan naroman ida ba família hotu ne’ebé luta hasoru difikuldade.
Nune'e, ho sentimentu gratidaun ne’ebé boot tebes, nia haktuir katak asaun Prezidente Repúblika nian haruka mensajen forte ida ne’ebé liu fali nia jornada pesoál.
“Ha’u agradese tebes ba Prezidente Ramos Horta. Ami-nia kondisaun moris sei la sai barreira, maibé motivasaun atu la’o ba oin, tanba esperansa nunka bosok," dehan Sofia.
Tanba ne'e, nia liafuan sira ne’e hanesan lian husi inan-aman sira ne’ebé servisu iha nakukun laran, hodi valida vida tomak nia terus ho silénsiu liuhusi momentu ida fó dignidade boot nian.
Enkuantu, desizaun Prezidente Repúblika nian nu’udar artikulasaun klaru ida husi nia vizaun ba nasaun vizaun ida ne’ebé haree no fó valór ba kontribuisaun sidadaun hotu-hotu nian.
Maibé, hodi hasa’e inan ida ne’ebé haraik-an ba palku mundiál, Prezidénsia Repúblika afirma katak forsa loloos Timor-Leste nian hela iha espíritu metin povu nian.
“Asaun ida ne’e defende dignidade servisu nian no hametin liután konesaun kle’an administrasaun nian ho povu ki’ik, hodi hatudu katak lideransa loloos mak rekoñese valór boot tebes iha moris lor-loron sira-nian ne’ebé hamutuk harii futuru nasaun nian,” Sita komunikadu.
