Portavoz Sentru Integradu Jestaun Krize (SIJK) Dr. Rui Maria de Araújo hatete, kazu konfirmadu pozitivu Covid-19 ne’ebé agora dadaun iha fatin izolamentu  Sentru Saúde Vera Cruz mantein 26.

“Dadus SIJK ba loron ohin, total kazu provavel 4, total rezultadu laboratoriu seidauk hatene 28, total rezultadu laboratoriu 327,”dehan nia iha konferensia imprensa iha CCD, ohin.

Nia informa, ema ne’ebé sei iha konfinamentu obrigatoriu hamutuk 432 kompostu husi konfinamentu obrigatóriu iha Dili hamutuk 337, iha fasilidade Governu iha munisipiu hamutuk 68 no nain 27 maka halo auto karantina iha munisípiu.

Nia informa, sira ne’ebé karantina ne’e na’in 21 maka profesional saúde sira durante ne’e fó asistensia iha fatin izolamentu no karantina. Ema ne’ebé liu ona periodu enkubasaun iha karantina hamutuk 1643, kompostu husi Dili hamutuk 1309 no iha munisipiu hamutuk 334.

SIJK apela nafatin ba populasaun sira katak, wainhira iha sintomas infesaun respiratoria aguda hanesan isin-manas, kakorok moras, me’ar, inus been, ruin siin halo favor ba konsulta iha sentru saúde sira.

Kolabora no partisipa ho disiplina iha distansiamentu sosial, distansiamentu fiziku no ijiene pesoal. Keta haluha hakmatek iha uma lalika sai arbiru ka halibur malu, fase liman bebeik ho sabaun, labele kose liman ba matan, inus no ibun, uza maskara bainhira sai husi uma.

 Nia mós husu ba maluk sira ne’ebé kompleta konfinamentu obrigatoriu karik iha mosu fali sintomas kontaktu ba númeru 119 hodi fó asistensia.