Enkuantu, oportunidade murak ne'ebé Nelia hetan, nu'udar parte ida hodi promove feto iha kareira lideransa no mós parte ida ba komemorasaun loron mundial labarik feto nian.
Nune’e, loron mundial labarik feto nu'udar loron ne’ebé selebra globalmente hodi fó onra ba labarik feto, bele halo advokasia hodi muda sira nia kondisaun atu hetan oportunidade iha aprende, lidera no moris buras no la ho dikriminasaun.
Estudante Nelia Bui de Araujo hateten, nia parte senti onradu no orgulho, tanba bele hetan oportunidade di'ak, hodi asume iha posizaun Komandante Jeral PNTL nian.
“Ha'u sente orgullu tebes no agradese ba Komandante Jerál ne’ebé fó oportunidade mai ha’u tanba bele assume kargu nu’udar Komandante Jerál Interinu durante oras rua nia laran,” dehan nia ba jornalista sira hafoin remata asume posizaun durante oras rua, iha Kuartel Jerál PNTL Kaicoli, Kinta ne’e (09/10/25).
Husi oportunidade ida ne'e, dezafia Nélia ho esperensa atu sei hakaas-aan liu tan hodi nune'e iha futuru bele sai hanesan Komisária Jerál PNTL.
Nia mós espresa katak, durante ninia mehi hakarak duni sai nu'udar ajente polisia, nune'e bele sai nu'udar servidor ba povu no nasaun.
"Tanba ne'e, ba oin ha'u nia esforsu mak estuda maka'as, nune'e bele atinji mehi ne'ebé mak sai nu'udar servidor ba povu no nasaun iha futuru"estudante ne’e hateten.
Iha fatin hanesan, atual Komandante Jerál PNTL, Komisariu Polisia Henrique da Costa akresenta tan katak, programa ne'e komando realiza, tanba hetan pedidu husi Plan Internasional ne’ebé husu atu promove labarik feto sira no uza tempu durante oras rua nia laran atu nune'e estudante Nelia Bui de Araujo bele asume posizaun ne'e.
"Programa ida ne'e, la'ós foin dahuluk hala'o ba PNTL, maibé ita akompañia hala'o mós ba iha ministeriu seluk no mós ba iha F-FDTL ninian desde tinan hirak ba kotuk", nia haktuir.
Komisariu ne'e konsidera, estudante Nelia asume posizaun ne'e nu'udar momentu oportunu, tanba PNTL hala’o hela prosesu rekrutamentu ninian, nune'e nafatin enkoraja ba alin sira atu prepara-aan.
"Ita enkoraja ba alin feto sira atu labele tauk no labele senti lakoi atu sai polisia, tanba ne'e liu-hosi prosesu rekrutamentu ne'e, sira bele aplika no bele tuir prosesu sira tomak sai polisia", nia adianta.
“Atu sai membru PNTL depende ba aan rasik, tanba ne'e alin Nelia Bui iha mehi atu sai polisia, mesmu agora nia sei eskola hela, mas espera mehi ida ne'e bele motiva nia para estuda didiak, nune'e futuru bele konkore ba vaga PNTL nian ruma bainhira loke,”tenik KomJer.
Entretantu, Jestor Igualdade Jeneru Plan Internasional Antoneta Maia, hatutan, atividade ne'e parte ida husi programa Plan Internasional nian atu promove igualdade ba labarik feto, liuhusi empoderamentu no mós promove sira nia ajensia no mós lideransa.
Nune’e, Plan Internasional hala’o programa ne'e komesa husi loron 01 to'o 12 fulan-Outobru hodi selebra loron mundial ba labarik feto, tanba kada tinan labarik feto sira sempre asume posizaun save, nune'e sira bele aprende kona ba servisu sira kada posizaun ne'ebé mak sira assume.
"Ida ne'e, ita agradese tebes, tanba ita hetan oportunidade atu alin feto ne'e asume kargu hanesan Komandante jeral, entaun saida mak ita hakarak atu alin Nelia bele aprende servisu PNTL Jerál no mós toma desizaun politika sira, no mós servisu hanesan lideransa iha PNTL” hakotu nia.
