Tuir informasaun ne’ebé jornalista Jornal INDEPENDENTE asesu husi fontes importante balun iha Polisia Nasionál Timor-Leste (PNTL) katak, loron ida hafoin autoridade prende osan rihun $130 ne’ebé halo Naimori ‘lalin’ membru governu na’in rua ba hasoru Diretór Nasional Informasaun Interna (DNII), Servisu Nasionál Intelijensia (SNI) no mosu diskusaun entre sira, Vise Ministru Interior, Antonio Armindo, haruka karta ba Komando Jeral PNTL.

Tuir fonte ne’e, iha 7 Outubru ne’e, Vise MI haruka karta ba Komando Jeral PNTL ho kontiudu atu demite DNII, Gastão Piedade.

“Informasaun inisiu dehan Vise Ministru Interior tenta fó presaun ba Komando Jeral PNTL atu demite Diretor Nasionál Informasaun Interna, Gastão, husi instituisaun PNTL,” dehan fonte importante iha PNTL ba jornalista Jornal INDEPENDENTE, Tersa (11/10).

Hafoin haruka karta, iha 11 Outubru, horseik, maizumenus tuku 9.00 oras Timor-Leste, Vise MI hakat ba Kuartel Jeral PNTL hodi hasoru-malu ho Komandante Jeral daruak PNTL, Komisariu Mateus Fernandes.

“Ohin (horseik) dadeer ne’e Vise Ministru Interior mai iha Komandu Jeral nia fatin, maibé koalia kona-ba asuntu saida ne’e ami la hatene,” dehan fonte ne’e.

Maibé, fonte ne’e hatutan, hafoin enkontru ne’e iha orientasaun balun ba Diretór Gastão atu mai hasoru-malu ho Komisariu Mateus, maibé enkontru ne’ebé tuir planu atu realiza iha tuku 14.00 OTL ne’e la konsege realiza tanba Komisariu Mateus nia kondisaun saúde la permite.

“Tuir loloos ne’e ohin (horseik) tuku rua loraik Diretór Gastão atu enkontru ho Komisariu Mateus, maibé enkontru ne’e kansela tanba Komisariu moras,” dehan fonte ne’e.

Relasiona ho kestaun ne’e, Komandante Jeral daruak PNTL Komisariu Mateus Fernandes hatete, nia parte seidauk simu karta husi Vise MI.

Karik iha duni karta, nia hatutan, Komandu sei haree, tetu no analiza molok foti deizaun.

“Karta ha’u seidauk simu, se ida ne’e iha duni ami sei haree hamutuk hafoin bele foti desizaun,” dehan Komisariu Mateus via telefone, Tersa (11/10).

Kona-ba kontiudu husi karta ne’ebé husu ba Komando PNTL atu demite DNII, Komisariu Mateus hataan, demisaun ne’e so bele halo bainhira membru SNI komete krime omesidu ka krime grave sira seluk.

“Mais entermu kazu ida ne’e tuir lei ita sei haree, maibé ha’u moras hela, seidauk haree karta ne’e, depois aban (ohin) ha’u tama ba haree mak fó fila fali resposta,” katak nia.

Iha fatin ketak, Diretór Fundasaun Mahein, Abel Amaral hatete, nia parte seidauk iha informasaun kona-ba kestaun ne’e, maibé karik Vise MI haruka duni karta ba Komandu Jeral PNTL atu halo demisaun ba DNII, Koamandu Jeral PNTL tenke hato’o fali karta ida ba Primeiru Ministru (PM), Taur Matan Ruak, nu’udar mós Ministru Interior (MI), atu demite membru governu ne’ebé mak impede prosesu justisa iha Timor-Leste.

“Se iha duni, ami husu ba PM Taur Matan Ruak ‘membru governu ne’ebé tuir ona alegasaun envolve iha kazu, di’ak liu mak demite, sira ne’e la merese atu kaer ukun iha Timor-Leste, tanba sira la kumpre lei’. Dalan di’ak mak demite membru governu, ita labele halimar ho prosesu justisa iha Timor-Leste,” nia hatete.