Dr. Rui apela ba pasajeiru sira bus Mabenifa-Baukau, relasiona ho pasajeiru na’in ida ne’ebé hamutuk ho bus refere konfirmadu positivu Covid-19, hafoin halo viajen husi Dili ba Baukau.
“Kazu ida iha Baucau ne’e halo viajen husi Dili ba Baucau iha loron 01 fulan marsu ho bus naran Mabenifa ho xapa matrikula 36-806 to’o iha Baucau tuku 8 kalan, no iha loron 02 fulan marsu 2021,”dehan Dr. Rui, liu husi konferensia imprensa, iha CCD (5/3).
Dr. Rui informa katak, identifika ona ema na’in 17 (Baucau ema na’in 9 no Dili ema na’in 8) ne’ebé konsideradu besik ho kazu na’in positivu ne’e.
Husi ema na’in 17 ne’e rejultadu teste hatudu negativu.
Maski negativu hotu sira sei nafatin iha karantina hodi hein tempu nesesario atu repete teste dala ida tan.
Kordenador Forsa Tarefa ba Prevensaun no Mitigasaun Surtu Covid-19 ne’e husu abitante sira hotu liliu, abitante husi Covalima, Bobonaro no Baukau atu tur hakmatek iha ida idak nia fatin hodi fó tempu ba ekipa saude atu nunee sira bele buka tuir kontaktu besik sira hotu, hodi bele halo exame iha laboratoriu.
Dadus Jeral ohin loron mak hanesan kazu foun 6, rekoperadu na’in 4 no kazu ativu baixa 25.
Pasiente sira sei halo tratamentu iha sala izolamentu Sentru Saude Vera Crus Dili.
