Tuir Diretór Jerál MSSI, Floréncio Pina Dias Gonzaga, hateten, MSSI alista ona benefisiariu hotu hodi haruka ba BNCTL hodi prepara sira nia konta bankária no lista benefisiáriu ba TPAY atu bele hahú prepara ba pagamentu.

Nia hatutan, ho akordu ida ne’e, BNCTL iha lejitimidade ba pagamentu ba benefisiariu iha area kobertura sira nian.

"Asinatura akordu ida ne’e, nuudar pasu ba ofisialmente halo kooperasaun lejítima ho BNCTL no TPAY nuudar parseiru. Hodi nune’e, fasilita pagamentu transferénsia osan ba benefisiáriu programa Bolsa da Mãe  Jerasaun Foun iha munísipiu Ainaro, Bobonaro no RAEOA,”dehan nia liu husi komunikadu ne’ebé Online INDEPENDENTE asesu, segunda horseik (11/07).

Nia esplika, benefisiáriu inan isin-rua sei simu dolar amerikanu $15 kada fulan, labarik tinan tolu mai kraik sei simu $20 kada fulan no suplementu adisionál $10 ba labarik ho defisiénsia to’o sira atinji tinan 6.

“To’o ohin loron, total aplikante ne’ebé rejista ona ba programa refere, iha munisípiu Ainaro, Bobonaro no RAEOA hamutuk 6.037,”dehan nia.

Nia akresenta, aplikasaun hirak ne’ebé aprovado ona liu husi prosesu verifikasaun mak aplikante sira ne’ebé rejistu hahú husi loron 17 to’o 30 Juñu no sei simu pagamentu dahuluk iha ida ne’e.

"Iha tempu badak Governo sei halo lansamentu pagamentu dahuluk ba benefisiáriu sira. Benefisiáriu hirak ne’ebé mak hetan ona aprovasaun sei hahú hetan pagamentu liu husi ajénsia pagamentu BNCTL no ka Fintech Tpay", tenik nia.

Aleinde subsídiu osan kada fulan, programa Bolsa da Mãe Jerasaun Foun mós fornese akonsellamentu kona-ba saúde husi pesoál saúde sira kona ba kuidadu saúde durante peródu isin-rua, periódu primeira infánsia inklui imunizasaun, nesesidade hahán nutritivu ba família no prátika ijéniku no sanitazasaun.

Enkuantu, Bolsa da Mãe Jerasaun Foun mak programa transferénsia osan ne’ebé estabelese ho Dekretu Lei númeru 22/2021 loron 10 Novembru.

Entretantu, iha tinan ida ne’e, programa ne’e sei hala’o uluk iha munisipiu tolu hanesan Ainaro, Bobonaro no RAEOA.