Ministra Saúde Odete Maria Freitas Belo hateten, nia parte simu ona  karta  pedidu pagamentu ba kustu vida husi pasiente sira ne'ebé halo hela tratamentu iha estranjeiru no dadaun ne'e MS Prepara hela atu halo atendimentu.

"Ami simu ona karta pedidu husi sira no agora ami prepara hela atu atende sira, ami iha problema oituan maka ami nia adidu ne'ebé maka serbisu iha ne'ebá tanba ita labele haruka osan ba ema wainhira la iha pedidu ruma" dehan nia iha Parlamentu Nasional, Ohin(06/10)

Nia relata ita koloka adidu iha ne'ebá ne'e nia serbisu atu tau matan ba pasiente sira iha ne'ebá nomós familia pasiente sira, nia mak iha obrigasaun atu bele halo proposta ba Ministru Saúde katak fulan to’o ona no ema tenke simu ema nia kustu vida.

"Agora proposta ida nee ita la simu, ami ho inisiativa husu ba ami nia gabinete atu kontaktu ho moras sira iha rai li'ur iha semana kotuk liu ba halo tiha ona no sira haruka ona karta mai maibé la liuhusi adidu importante mak ne'e ami prosesu hela sira nia kustu da vida" haklaken nia.

Entretantu kona ba númeru pasiente no totál kustu vida Ministru Saúde seidauk bele fiksa maibé sei kontinua nafatin prosesa atu pasiente sira ne'ebé maka dadaun ne'e halo tratamentu iha estranjeiru bele hetan sira nia kustu ba vida durante halo iha estranjeiru.