“Ita nafatin haruka médiku sira ba rai li’ur, atu kontinua sira nia espesialidade, tanba agora daudaun Óspitál Nasionál Guido Valadares iha espesialista pediatria, obstretia, jinekolojia, sirujiaun no anestesia, maibé ita nafatin haruka ita nia médiku sira ba kontinua área ida ne’e, tanba ita hakarak kompleta médiku espesialista sira ne’e ba Óspitál Referál sira,”dehan nia iha Palasiu Governu, kuarta horseik (05/10).
Nia hatutan, la’ós haruka médiku de’it, maibé haruka mós enfermeiru sira atu nune’e bele mai apoiu servisu médiku-sira nian.
"Primeiru ami mós la'ós hare ba médiku de'it, maibé bainhira ami iha ona polítika ida katak, bainhira ita haruka espesialista sira, ita mós tenki haruka enfermeiru sira, sai hanesan pakote ida, atu nune'e bainhira médiku sira mai hala'o ninia servisu, ita mós iha ona infermeiru sira bele apoiu hala sira nia servisu,"nia esplika.
Tan ne’e, Nia dehan, Ministeriu Saúde persiza aloka orsamentu ida atu bele haruka médiku espesialista sira ba eskola.
"Ita sempre iha kontinuasaun, haruka ita nia médiku espesialista sira ba kontinua sira nia meritu jerál ne'ebé servisu kleur ona, bele ba kontinua sira nia espesialidade depende ba nesesidade Ministeiriu Saúde nian," haktuir MS.
Entretantu, tuir dadus, husi Ministériu Saúde, dadauk ne’e iha médiku espesialista timoroan hamutuk na’in 74 ne’ebé halo atendimentu iha HNGV, no mós Óspital Referal sira.
Enkuantu, husi númeru médiku hirak ne’e mak hanesan, médiku iha área espesialista anestesia na’in haat (4), dentista na’in-rua (2), dermatolojista na’in-tolu (3), endrokolojia na’in-rua (2), espesialista ba tilun, kakorok no ibun na’in-rua (2).
Aleinde, espesialista ba jenekolojia tolu (3), internista lima (5), intensiva emerjénsia lima (5), kardiolojia na’in-hitu (7), nefrolojia na’in-neen (6), objym na’in neen (6).
Oftamolojista na’in lima (5), onkolojia rua (2), ortopedista rua (2), patolojia anatomi ida (1), patolojia klínika ida (1), pediatria haat (4), psikataria rua (2), polmonolojista rua (2), radiolojista rua (2) no sirurjiaun neen (6).
